ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ޖަލްސާތައް އެއްކޮށް ނިންމާލުމަށްފަހު، މަޖިލިސް ރަސްމީކޮށް ޗުއްޓީއަށް ހިނގައްޖެއެވެ.
މަޖިލީހުގެ ގަވާއިދުގައިވާ ގޮތުން ދެވަނަ ދައުރުގެ ޖަލްސާތައް އޮގަސްޓު މަހުގެ 15 ވަނަ ދުވަހުގެ ނިޔަލަށް ނިންމަންޖެހުނު ނަމަވެސް، މަޖިލީހުގެ ތަޅުމާއި ކޮމިޓީތަކުގައި ނުނިމި ހުރި މުހިންމު މަސައްކަތްތަކާއި ބިލުތަކުގެ ބަހުސް ފުރިހަމަކުރުމަށްޓަކައި މުއްދަތު ދެ ފަހަރެއްގެ މަތިން އިތުރުކުރިއެވެ. އެގޮތުން އެންމެ ފަހުން ދައުރު ދަންމާލާފައިވަނީ އޮގަސްޓު 27 ވަނަ ދުވަހުގެ ނިޔަލަށެވެ.
މިއަހަރުގެ ފުރަތަމަ ދައުރުގެ ޖަލްސާތައްވެސް މަސައްކަތް ބޮޑުވުމުގެ ސަބަބުން ދަންމާލުމަށްފަހު، ދެވަނަ ދައުރުގެ މަސައްކަތްތައް ފަށާފައިވަނީ މެދުކެނޑުމެއް ނެތިއެވެ.
މަޖިލީހުގެ ގަވާއިދު ބުނާގޮތުން އަހަރީ މަސައްކަތްތައް ބަހާލެވިފައިވަނީ ތިން ދައުރަކަށެވެ. އެއީ ފެބްރުވަރީ 1 އިން މެއި 15 އަށް ހިނގާ ފުރަތަމަ ދައުރާއި، ޖޫން 1 އިން އޮގަސްޓު 15 އަށް ހިނގާ ދެވަނަ ދައުރުގެ އިތުރުން، އޮކްޓޯބަރު 1 އިން ނޮވެމްބަރުގެ ނިޔަލަށް ކުރިއަށްދާ ތިންވަނަ ދައުރެވެ.
މަޖިލިސް މިހާރު ޗުއްޓީއަށް ގޮސްފައިވީނަމަވެސް، ޗުއްޓީގެ މުއްދަތުގައިވެސް ކޮމިޓީތަކުގެ މުހިންމު މަސައްކަތްތައް ކުރިއަށްދާނެއެވެ. އަދި ގައުމީ މުހިންމު ކަމެއް ދިމާވެއްޖެނަމަ، ހާއްސަ ޖަލްސާއެއް ބޭއްވުމުގެ ފުރުސަތު ގަވާއިދުގެ ތެރެއިން ލިބިގެންވެއެވެ. ގަވާއިދުގައިވާ ގޮތުގެ މަތިން ދެން އެންމެ އަވަހަށް ތިންވަނަ ދައުރުގެ ޖަލްސާތައް ފެށިގެންދާނީ އަންނަ އޮކްޓޯބަރު މަހުގެ 1 ވަނަ ދުވަހުއެވެ.
