ދިވެހިރާއްޖޭގެ ޤައުމީ ފައިސާގެ މުޢާމަލާތްތަކާ ބެހޭ ނިޒާމު އިތުރަށް ހަރުދަނާކޮށް ޒަމާނީކުރުމަށްޓަކައި، ނޭޝަނަލް ޕޭމަންޓް ސްވިޗް ޤާއިމުކުރުމަށް މަގުފަހިކޮށްދޭ ބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ތަސްދީޤުކުރައްވައިފިއެވެ. މި ބިލަކީ ދިވެހިރާއްޖޭގެ ޕޭމަންޓް ސިސްޓަމްގެ ޤާނޫނަށް އިޞްލާޙު ގެނައުމަށްޓަކައި ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައި، ފާސްކޮށްފައިވާ ބިލެކެވެ.
މި ގެނެވުނު އިޞްލާޙުގެ ދަށުން، ރާއްޖޭގެ މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ޤައުމީ ފައިސާ ބަދަލުކުރުމުގެ ނިޒާމުގެ ތެރެއިން ވަކި ނިޒާމެއް ނޭޝަނަލް ޕޭމަންޓް ސްވިޗްގެ ގޮތުގައި ކަނޑައެޅުމުގެ ބާރު ލިބިގެންދާނެއެވެ. އަދި ރާއްޖޭގައި ހިންގާ ބޭންކުތަކާއި ފައިސާގެ ޚިދުމަތްދޭ އެހެނިހެން އިދާރާތަކުން ކުރާ މުޢާމަލާތްތައް މި ސްވިޗް މެދުވެރިކޮށް ކުރިއަށްގެންދިއުމަށް އެމްއެމްއޭއަށް އެންގިދާނެއެވެ.
މި ނިޒާމު ޤާއިމުވުމުން ބޭންކުތަކާއި ފައިސާގެ ޚިދުމަތްދޭ ތަންތަނުގެ މެދުގައި ކުރެވޭ މުޢާމަލާތްތައް އެއް ވިއުގައަކުން ގުޅާލެވި، ޚިދުމަތްތަކުގެ އަގު ހެޔޮވެގެންދާނެއެވެ. އެގޮތުން އެއް ބޭންކެއްގެ ކާޑު ނުވަތަ ޑިޖިޓަލް ވޮލެޓް ބޭނުންކޮށްގެން އެހެން ބޭންކެއްގެ ކިއުއާރު ކޯޑު ނުވަތަ ޕީއޯއެސް މެޝިންތައް މެދުވެރިކޮށް ފަސޭހަކަމާއެކު ފައިސާ ދެއްކުމުގެ މަގު ތަނަވަސްވެގެންދާނެއެވެ.
މީގެ އިތުރުން، ރާއްޖޭގެ އެތެރޭގައި ހިންގާ މާލީ މުޢާމަލާތްތައް ބޭރުގެ ޕޭމަންޓް ނެޓްވޯކްތަކަށް ބަރޯސާނުވެ، ރާއްޖޭގައި ޤާއިމުކޮށްފައިވާ ނިޒާމެއްގެ ތެރެއިން ހިންގުމަށް މަގުފަހިވުމަކީ ޤައުމީ ސަލާމަތާއި އިޤްތިޞާދީ މިނިވަންކަމަށް ލިބިގެންދާނެ ބޮޑު ކުރިއެރުމެކެވެ. މި ބިލު ރައީސުލްޖުމްހޫރިއްޔާ ތަސްދީޤުކުރެއްވުމާ ގުޅިގެން، މިއަދުން ފެށިގެން މި ޤާނޫނަށް ޢަމަލުކުރަން ފަށާނެއެވެ.
