ކުރީގެ ބަންޑާރަ ނައިބު އާއިޝަތު އާޒިމާ ޝަކޫރު، ރައީސުލްޖުމްހޫރިއްޔާގެ އޮފީހުގެ އިސް މަގާމަކަށް މިއަދު އައްޔަންކުރައްވައިފިއެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އާޒިމާ އައްޔަންކުރެއްވީ ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓަރީގެ މަގާމަށެވެ.
މި އައްޔަންކުރެއްވުމާ ގުޅިގެން އާޒިމާ ވަނީ މިއަދުން ފެށިގެން ރައީސް އޮފީހުގައި މަސައްކަތް ކުރައްވަން ފައްޓަވާފައެވެ. އާޒިމާ އަކީ ރައީސް ޑރ. މުހައްމަދު މުއިއްޒުގެ އާއިލީ ގާނޫނީ ވަކީލެއްގެ ގޮތުގައިވެސް މަސައްކަތް ކުރައްވާފައިވާ ބޭފުޅެކެވެ.
އާޒިމާ ޝަކޫރަކީ ދިވެހިރާއްޖޭގެ ބަންޑާރަ ނައިބުކަމުގެ މަގާމު ތިން ފަހަރެއްގެ މަތިން ފުރުއްވާފައިވާ، ގާނޫނީ ދާއިރާގެ ގިނަ ތަޖުރިބާތަކެއް ލިބިވަޑައިގެން ހުންނެވި ބޭފުޅެކެވެ. މީގެ އިތުރުން ކުރީގެ ރައީސް ޔާމީންގެ ވެރިކަމުގައި ރައީސް އޮފީހުގެ ލީގަލް އެފެއާޒް މިނިސްޓަރުގެ މަގާމާއި، ޖެންޑާ މިނިސްޓަރުގެ މަގާމުވެސް އެކަމަނާ ވަނީ އަދާކުރައްވާފައެވެ.
އެންމެ ފަހުން ބޭއްވުނު މާލެ ސިޓީގެ މޭޔަރު ހޮވުމުގެ ބައި-އިލެކްޝަންގައި ވެރިކަންކުރާ ޕީޕަލްސް ނޭޝަނަލް ކޮންގްރެސްގެ ޓިކެޓުގައި އާޒިމާ ވަނީ ވާދަކުރައްވާފައެވެ. ސަރުކާރުގެ އިސް މަގާމުތަކެއް ފުރުއްވާފައިވާ އާޒިމާ ރައީސް އޮފީހުގެ އިސް މަގާމަކަށް މި އައްޔަންކުރެއްވީ ސަރުކާރުގެ ގާނޫނީ އަދި އިދާރީ ހިންގުން ހަރުދަނާކުރުމަށް ކުރަމުންދާ މަސައްކަތްތަކުގެ ތެރެއިންނެވެ.
