ސަރުކާރު ހިއްސާވާ ކުންފުނިތައް ރައިޓްސައިޒް ކުރުމަށް ކުރާ މަސައްކަތުގެ ދަށުން ވަޒީފާއިން ވަކިކުރާ މުވައްޒަފުންނާއި އަމިއްލައަށް ވަޒީފާ ދޫކޮށްލާ ފަރާތްތަކުން އަމިއްލަ ވިޔަފާރިއެއް ނުވަތަ މަސައްކަތެއް ފެށުމަށް އެހީތެރިވުމުގެ ގޮތުން 600 މިލިއަން ރުފިޔާގެ ބޮޑު ފަންޑެއް ގާއިމުކޮށްފައިވާކަން މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު ހަސަން ޒަރީރު ހާމަކުރައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން ވަޒީރު ވަނީ މި ފަންޑާ ބެހޭ ތަފްސީލުތައް ހިއްސާކުރައްވާފައެވެ. މާލީ ވަޒީރު ވިދާޅުވީ ސަރުކާރު ކުންފުނިތަކުން މުވައްޒަފުން ވަކިކުރުމަށް ނިންމާފައިވަނީ އެ މުވައްޒަފުންނަށް އިތުރު ގޮތްތަކާއި ފުރުސަތުތައް ހޯދައިދިނުމަށްފަހު ކަމަށެވެ. އެގޮތުން ކުންފުނިތަކުން މުވައްޒަފުން ވަކިކުރާއިރު ރިޑަންޑެންސީ ޕެކޭޖުގެ ދަށުން އެ މީހަކު ވަޒީފާ އަދާކުރި މުއްދަތަށް ބަލައި މާލީ އިނާޔަތެއް ދެވޭނެއެވެ.
މީގެ އިތުރުން، އަމިއްލަ މަސައްކަތެއް ފަށަން ބޭނުންވާ ފަރާތްތަކަށް އެސްއެމްއީ ޑިޖިޓަލް މެދުވެރިކޮށް ލޯނު ދޫކުރުމުގެ އިންތިޒާމު މިހާރު ވަނީ ހަމަޖައްސާފައެވެ. "ކުމެވި ފަންޑް" ގެ ނަމުގައި އެސްއެމްއީ ޑިޖިޓަލްގައި ގާއިމުކޮށްފައިވާ މި ފަންޑަކީ ވަޒީފާއިން ވަކިވާ އަދި ވަކިކުރާ މުވައްޒަފުން އަލަށް ވިޔަފާރި ފަށަން ހުޅުވާލަދޭ ދޮރެއްކަން ވަޒީރު ފާހަގަކުރެއްވިއެވެ. މި ފަންޑުގެ ދަށުން އެހީތެރިކަން ހޯދުމަށް އެދި ކޮންމެ ބޭފުޅަކަށްވެސް އަމިއްލަ މަސައްކަތެއް ކުރުމުގެ ބިޒްނަސް ޕްރޮޕޯސަލް ހުށަހެޅުމުގެ ފުރުސަތު ވަނީ ހުޅުވާލާފައެވެ.
އަދި އެފަދަ ޕްރޮޕޯސަލްތައް ތައްޔާރުކުރުމުގައި ބިޒްނަސް ސެންޓަރ ކޯޕަރޭޝަން (ބީސީސީ) ގެ އެހީތެރިކަން ލިބިގެންދާނެ ކަމަށްވެސް މާލީ ވަޒީރު ވިދާޅުވިއެވެ. ސަރުކާރުގެ އަމާޒަކީ ކުންފުނިތައް މާލީގޮތުން ހަރުދަނާކޮށް، ހިންގުމުގެ ހަރަދުތައް ކުޑަކުރާއިރު، އޭގެ ސަބަބުން ވަޒީފާ ގެއްލޭ މުވައްޒަފުންނަށް ދިރިއުޅުމުގެ އާ މަގުތައް ދައްކައިދީ، އަމިއްލަ ފައިމައްޗަށް ތެދުވުމުގެ ފުރުސަތު ފަހިކޮށްދިނުމެވެ. މި ފިޔަވަޅުގެ ސަބަބުން ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް އިތުރު ދިރުމެއް ލިބިގެންދާނެ ކަމަށް ސަރުކާރުން ލަފާކުރެއެވެ.
