ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން އދ. މަހިބަދޫގެ މަގުތައް ޒަމާނީ ފެންވަރަށް ތަރައްޤީ ކުރުމަށް ހިންގާ މަޝްރޫޢުގެ ތެރެއިން، މަގުތަކުގައި ކޭބަލް ޖަންކްޝަންތައް ބެހެއްޓުމުގެ މަސައްކަތް މިހާރު ބާރަށް ކުރިއަށްދާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ހާމަކޮށްފިއެވެ.
މި މަޝްރޫޢަކީ މަހިބަދޫގެ މަގުތަކުގެ ހާލަތު ރަނގަޅުކޮށް، އާންމުންނަށް ދަތުރުފަތުރު ކުރުމުގައި ދިމާވާ ދަތިތަކަށް ދާއިމީ ހައްލެއް ހޯދައިދިނުމުގެ މަގުސަދުގައި ކުރިއަށްގެންދާ މުހިންމު މަޝްރޫޢެކެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން އދ. މަހިބަދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ ދަށުން، ކޭބަލް ޖަންކްޝަންތައް ބެހެއްޓުމުގެ މަސައްކަތް މިހާރު ދަނީ ކުރަމުން.#TeamRDC pic.twitter.com/gnguQoyOgy
— Road Development Corporation Ltd (@rdcmaldives) August 4, 2026
މި މަޝްރޫޢުގެ ދަށުން މަހިބަދޫގެ ބޮޑެތި މަގުތަކުގައި ތާރުއެޅުމާއި ނުވަތަ ގާ އެތުރުމުގެ އިތުރުން، ވާރޭވެހި ފެންބޮޑުވުމުގެ މައްސަލައަށް ހައްލެއް ހޯދުމަށް ފެންހިންދާ ނިޒާމު ގާއިމުކުރުމުގެ މަސައްކަތް ހިމެނެއެވެ. އަދި މަގުތައް ކޮނުމެއްނެތި ތަފާތު ޚިދުމަތްތަކަށް ބޭނުންވާ ކޭބަލްތައް އެޅޭނެ ގޮތަށް ކޭބަލް ޖަންކްޝަންތަކާއި ކޭބަލް ޓްރޭ ގާއިމުކުރުމާއި، މަގުބައްތި ޖެހުމާއި، މަގުމަތީގެ ނިޝަންތައް ހަރުކުރުމުގެ މަސައްކަތްވެސް އާރްޑީސީން ކުރިއަށްގެންދާނެއެވެ.
އާރްޑީސީން މައުލޫމާތު ދޭ ގޮތުގައި، މަހިބަދޫ މަގު ހެދުމުގެ މަޝްރޫޢު ތާވަލާ އެއްގޮތަށް ނިންމުމަށްޓަކައި އަމަލީ މަސައްކަތްތައް ހުއްޓުމެއްނެތް ކުރިއަށްދާއިރު، ކޭބަލް ޖަންކްޝަންތައް ބެހެއްޓުމަކީ މަގުތަކުގެ އަޑީގެ ވަސީލަތްތައް ތަރައްގީކުރުމުގައި ނުހަނު މުހިންމު މަރުހަލާއެކެވެ. މި މަޝްރޫޢު ނިމުމުން މަހިބަދޫގެ އިގްތިސާދީ އަދި އިޖުތިމާއީ ހަރަކާތްތަކަށް ބޮޑު އިންގިލާބީ ބަދަލެއް އައިސް، ރައްޔިތުންނަށް ދަތުރުފަތުރު ކުރުމުގައި ބޮޑެތި ލުއިފަސޭހަތަކެއް ލިބިގެންދާނެއެވެ.
