ރާއްޖޭގައި ތިބެގެން އިނގިރޭސިވިލާތުގެ ވިސާ ނެގޭނެ އިންތިޒާމު ހަމަޖެއްސުމުގެ ގޮތުން މާލޭގައި ވަގުތީ ވިސާ ކްލިނިކެއް ގާއިމްކުރުމަށް ނިންމާފައިވާ ކަމަށް ހާރިޖީ ވުޒާރާއިން މިއަދު ހާމަކުރައްވައިފިއެވެ.
އެ ވުޒާރާއިން މައުލޫމާތު ދެއްވި ގޮތުގައި، ވީއެފްއެސް ގްލޯބަލް އިން އިންތިޒާމުކުރާ މި ކްލިނިކް ކުރިއަށްދާނީ އަންނަ އޮގަސްޓް މަހުގެ 10 އިން 12 އަށް، މާލޭގެ މާގިރީ ހޮޓަލުގައެވެ. މިއީ މަތީ ތައުލީމު ހާސިލުކުރުމަށް އިނގިރޭސިވިލާތަށް ދާ ދިވެހި ދަރިވަރުންނާއި އެހެނިހެން ފަރާތްތަކަށް އެހީތެރިވުމުގެ ގޮތުން ކޮންމެ އަހަރަކުވެސް އިންތިޒާމްކުރެވޭ ކްލިނިކެކެވެ. މީގެ ސަބަބުން، ރާއްޖެއިން ބޭރަށް ނުގޮސް ސީދާ މާލޭގައި ތިބެގެން ބަޔޮމެޓްރިކްސް ރަޖިސްޓްރީކުރުމާއި ބޭނުންވާ ސަޕޯޓިން ޑޮކިއުމަންޓްތައް ހުށަހެޅުމުގެ ފަސޭހަ މަގު ފަހިވެގެންދާނެއެވެ.
އިނގިރޭސި ވިސާއަށް އެދި ހުށަހަޅަން ބޭނުންވާ ފަރާތްތަކުން އޮންލައިން އެޕްލިކޭޝަން ފުރިހަމަކުރުމަށްފަހު، އެޕޮއިންޓްމަންޓް ބުކްކުރުމަށްޓަކައި ރަސްމީ ސްޓޫޑެންޓް ވިސާ ޕޯޓަލް ބޭނުންކުރުމަށް ހާރިޖީ ވުޒާރާއިން ވަނީ އިލްތިމާސްކުރައްވާފައެވެ.
