ރާއްޖެއަށް ޒިޔާރަތްކުރާ ކޮންމެ ހަތަރު ފަތުރުވެރިއަކުން އެކަކީ މީގެ ކުރިން ވެސް ރާއްޖެއަށް ޒިޔާރަތްކޮށްފައިވާ، ނުވަތަ ތަކުރާރުކޮށް ޒިޔާރަތްކުރާ ފަތުރުވެރިން ކަމަށް މިނިސްޓްރީ އޮފް ޓޫރިޒަމުން އާންމުކުރި އެންމެ ފަހުގެ ތަފާސްހިސާބުތަކުން ދައްކައިފިއެވެ.
މިކަން ހާމަވެފައިވަނީ އެ މިނިސްޓްރީން ދާދިފަހުން ނެރުނު "މޯލްޑިވްސް ވިޒިޓާ ސާވޭ" ގެ ހޯދުންތަކުންނެވެ. މި ދިރާސާގެ ނަތީޖާތަކަށް ބަލާއިރު، ސާވޭގައި ބައިވެރިވި ފަތުރުވެރިންގެ 78 އިންސައްތަ މީހުން ބުނެފައިވަނީ ޗުއްޓީ ހޭދަކުރުމަށް އެންމެ ފުރަތަމަ އިސްކަންދޭ މަންޒިލަކީ ދިވެހިރާއްޖެ ކަމަށެވެ.
މީގެ އިތުރުން 19 އިންސައްތަ ފަތުރުވެރިން ވަނީ އެންމެ ދާން ބޭނުންވާ މަންޒިލްތަކުގެ ތެރޭގައި ރާއްޖެ ހިމެނޭ ކަމަށް ފާހަގަކޮށްފައެވެ. މިއީ ދުރު ރާސްތާގެ އަގުބޮޑު މަންޒިލެއްގެ ގޮތުގައި ރާއްޖެ އޮތް ނަމަވެސް، ދުނިޔޭގެ ބާޒާރުގައި ރާއްޖެއަށް އޮތް މަގުބޫލުކަން ދަމަހައްޓަމުންދާ ކަމުގެ ހެއްކެކެވެ.
ފަތުރުވެރިން ރާއްޖެ އިހްތިޔާރު ކުރާ މައިގަނޑު ސަބަބުތަކަށް ބަލާއިރު، ރާއްޖޭގެ ސާފު ގޮނޑުދޮށްތަކާއި ކަނޑުގެ ދިރުންތައް ހިމެނެއެވެ. ސާވޭގައި ބައިވެރިވި މީހުންގެ ތެރެއިން 11 އިންސައްތަ ފަތުރުވެރިން ހަމައެކަނި ގޮނޑުދޮށްތަކާއި ކަނޑުގެ ގުދުރަތީ ރީތިކަމަށްޓަކައި ރާއްޖެ އައިސްފައިވާއިރު، 5 އިންސައްތަ މީހުން ރާއްޖެ އިހްތިޔާރު ކުރީ ރާއްޖެއަކީ އަމާން ރައްކާތެރި މަންޒިލަކަށް ވުމުންނެވެ.
މި ސާވޭއިން ހާމަވި ގޮތުގައި ރާއްޖެއަށް ދަތުރުކުރާ ގިނަ ފަތުރުވެރިންނަކީ ދަތުރުގެ 3 މަސް ނުވަތަ 12 މަސް ކުރިން ދަތުރު ރާވައި ތައްޔާރުވާ މީހުންނެވެ. ހާއްސަކޮށް ރިސޯޓުތަކާއި ސަފާރީތަކުގައި ޗުއްޓީ ހޭދަކުރާ ފަތުރުވެރިން ދަތުރު ރޭވުމަށް ގިނަ ވަގުތު ހޭދަކުރާކަން މި ދިރާސާއިން ވަނީ ފާހަގަކުރެވިފައެވެ.
