ސްޓޭޓް އިލެކްޓްރިސިޓީ ކޮމްޕަނީ (ސްޓެލްކޯ) އަށް މިދިޔަ އަހަރު ނިމުނުއިރު ސާފު ފައިދާގެ ގޮތުގައި 239 މިލިއަން ރުފިޔާ ލިބިފައިވާކަމަށް އޮޑިޓް އ打ފީހުގެ ރިޕޯޓުން ދައްކައިފިއެވެ. މިއީ އޭގެ ކުރީ އަހަރާ އަޅާބަލާއިރު ގާތްގަނޑަކަށް 30 ޕަސެންޓްގެ އިތުރުވުމެކެވެ. 2024 ވަނަ އަހަރު އެ ކުންފުންޏަށް ފައިދާގެ ގޮތުގައި ލިބިފައިވަނީ 181 މިލިއަން ރުފިޔާއެވެ.
ކުންފުނީގެ ފައިދާ އިތުރުވުމަށް މެދުވެރިވި މައިގަނޑު ސަބަބުތަކަކީ އާމްދަނީ އިތުރުވުމާއި، ދަރަންޏަށް ކުރި ހޭދަ ކުޑަކުރުމުގެ އިތުރުން ހިންގުމުގެ ހަރަދުތައް ކުޑަކުރުމެވެ. އެގޮތުން މިދިޔަ އަހަރު ސްޓެލްކޯއަށް އާމްދަނީގެ ގޮތުގައި 3.3 ބިލިއަން ރުފިޔާ ލިބިފައިވާއިރު، މި އާމްދަނީ ހޯދުމަށްޓަކައި ކުންފުނިން ކުރި ހަރަދަކީ 2.6 ބިލިއަން ރުފިޔާއެވެ.
މީގެ އިތުރުން ކުންފުނީގެ ހިންގުމާއި އެޑްމިނިސްޓްރޭޓިވް ކަންކަމަށް ކުރި ހޭދަ ވަނީ 15 ޕަސެންޓް ދަށްވެފައެވެ. މުވައްޒަފުންގެ މުސާރައާއި ހިންގުމުގެ އެހެނިހެން ކަންކަމަށް މިދިޔަ އަހަރު 392 މިލިއަން ރުފިޔާ ހިނގާފައިވާއިރު، ލޯނު އަނބުރާ ދެއްކުމަށް ހޭދަކުރީ 140 މިލިއަން ރުފިޔާއެވެ. މިއީ އޭގެ ކުރީ އަހަރު ލޯނު ދެއްކުމަށް ހޭދަކުރި 150 މިލިއަން ރުފިޔާއާ އަޅާބަލާއިރު ކުޑަ އަދަދެކެވެ.
ކުންފުނީގެ އާންމު ހަރަދުތައް ކުޑަކުރި ނަމަވެސް، ބައެއް ދާއިރާތަކުން ހަރަދު ވަނީ ބޮޑުތަނުން އިތުރުވެފައެވެ. އެގޮތުން މާލެއާއި ބައެއް ރަށްރަށަށް ކަރަންޓުގެ ހިދުމަތްދޭ ކުންފުނިން ތެލުގެ ހަރަދަށް މިދިޔަ އަހަރު 66 މިލިއަން ރުފިޔާ ހޭދަކުރިއެވެ. މިއީ އޭގެ ކުރީ އަހަރުގެ ހޭދައާ އަޅާބަލާއިރު 45 ޕަސެންޓް އިތުރު އަދަދެކެވެ.
ހަމައެއާއެކު ކުންފުނިން ރިޓަޔަކުރި މީހުންނަށް ދިން އިނާޔަތްތައް ނުވަތަ ރިޓަޔަމެންޓް ބެނެފިޓްސްއަށް ކުރި ހޭދަ ވަނީ 300 ޕަސެންޓް އިތުރުވެފައެވެ. އެގޮތުން މިދިޔަ އަހަރު ރިޓަޔަމެންޓް ބެނެފިޓަށް 20 މިލިއަން ރުފިޔާ ހޭދަކުރިއިރު، އޭގެ ކުރީ އަހަރު އެކަމަށް ހޭދަވީ އެންމެ 5 މިލިއަން ރުފިޔާއެވެ.
ސްޓެލްކޯއަކީ މާލެ ސަރަހައްދުގެ އިތުރުން މި ސަރަހައްދުގެ އެހެން ބައެއް އަތޮޅުތަކުގެ ރަށްރަށަށް ކަރަންޓުގެ ހިދުމަތް ފުޅާދާއިރާއެއްގައި ފޯރުކޮށްދެމުންދާ ކުންފުންޏެކެވެ.
