މިދިޔަ އަހަރު ރާއްޖޭގެ މިނިވަންކަމަށް 60 އަހަރު ފުރުމާ ގުޅިގެން މާލެ ސަރަހައްދުގައި ކުރިއަށްގެންދިޔަ ކުލަގަދަ ހަރަކާތްތަކަށް ދައުލަތުން 4.1 މިލިއަން ރުފިޔާ ހަރަދުކޮށްފައިވާ ކަމަށް މިނިސްޓާ އޮފް އާޓްސް، ކަލްޗާ އެންޑް ހެރިޓޭޖް ހީނާ ވަލީދު މިއަދު ވިދާޅުވެއްޖެއެވެ.
މިނިސްޓަރު ހީނާ މިކަން ހާމަކުރެއްވީ، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) ކުރެއްވި ސުވާލުތަކަށް ޖަވާބުދެއްވުމަށް މިއަދުގެ ޖަލްސާއަށް ހާޒިރުވެވަޑައިގަތުމަށްފަހުއެވެ.
މިނިވަންކަމުގެ އަލމާސް ޔޫބީލްއާ ގުޅިގެން ހިންގި ހަރަކާތްތަކަށް ހިނގި ޚަރަދާއި، ރަށްރަށުގައި އެކަމަށް ކުރި ޚަރަދާ ގުޅޭގޮތުން މެންބަރު ކުރެއްވި ސުވާލަށް ޖަވާބުދެއްވަމުން މިނިސްޓަރު ވިދާޅުވީ، މާލޭ ފިޔަވައި އަތޮޅުތެރޭގެ އެއްވެސް ހިސާބެއްގައި މިނިސްޓްރީގެ ފަރާތުން އެއްވެސް ހަރަކާތެއް ހިންގާފައި ނުވާނެ ކަމަށެވެ.
އެހެންކަމުން، ދައުލަތުން ހިނގި ޖުމްލަ 4.1 މިލިއަން ރުފިޔާގެ ޚަރަދަކީ މާލޭގައި އެ ހަރަކާތްތައް ބޭއްވުމަށް ހިނގާފައިވާ ޚަރަދެއް ކަމަށް ހީނާ ވަލީދު ބަޔާންކުރެއްވިއެވެ.
މިދިޔަ އަހަރުގެ ޖުލައި 26 އާ ދިމާކޮށް، ގިނަ ބައެއްގެ ބައިވެރިވުމާއެކު މާލެއާއި ހުޅުމާލޭގެ ބޮޑެތި މަގުތަކުގައި ގިނަ ހަރަކާތްތަކެއް ކުރިއަށްދިޔައެވެ. ކުރިން މިނިސްޓްރީން އާންމުކޮށްފައިވާ ގޮތުން މި ހަރަކާތްތަކުގެ ތެރޭގައި ހިމެނެނީ:
-
ދިދަ ނެގުމުގެ ރަސްމިއްޔާތު: މިނިވަން ދުވަހުގެ ހަރަކާތްތައް ރަސްމީކޮށް ފެށީ ޖުމްހޫރީ މައިދާނުގައި ގައުމީ ދިދަ ނެގުމުގެ ޚާއްޞަ ހަރަކާތުންނެވެ.
-
ޕެރޭޑާއި ހެވިކަން: އެމްއެންޑީއެފްގެ އަސްކަރީ ހަރަކާތްތައް ހިމެނޭ ޕެރޭޑާއި، ރާއްޖޭގެ ގައުމީ ކެޑޭޓުކޯގެ ޕެރޭޑު މާލެއާއި ހުޅުމާލޭގެ ބޮޑެތި މަގުތަކުގައި ކުރިއަށް ގެންދިޔައެވެ.
-
ކުޅިވަރުތަކާއި ސަގާފީ ހަރަކާތްތައް: ޖުމްހޫރީ މައިދާނުގައި ހަވީރު ބޭއްވި ހެވިކަމާއި ކުޅިވަރުގެ ތެރޭގައި ސްކޫލުތަކުގެ ކުޅިވަރުތަކާއި ސަގާފީ އެކި ކުޅިވަރުތައް ހިމެނެއެވެ.
-
ފުޅަނދުބުރު: މާލޭގެ ބޮޑެތި މަގުތަކުގައި އާންމުންގެ ބޮޑު ތަރުހީބަކާއެކު މިނިވަން ދުވަހުގެ ފުޅަނދުބުރު ބާއްވާފައިވެއެވެ.
މި ތާރީޚީ މުނާސަބަތު ކުލަގަދަކޮށް ފާހަގަކުރުމަށްޓަކައި، މިދިޔަ އަހަރު ސަރުކާރުން ވަނީ ޖުލައި މަހުގެ 28 އާ ހަމައަށް ރަސްމީ ބަންދު ދުވަސްތަކެއްގެ ގޮތުގައި ކަނޑައަޅާފައެވެ.
މިނިވަން ދުވަހުގެ ރަސްމީ ޖަލްސާ ބޭއްވުމުގެ އިތުރުން، ރާއްޖޭގެ މިނިވަންކަމަށް 60 އަހަރު ފުރުމުގެ މި އުފާވެރި މުނާސަބަތާ ދިމާކޮށް އިންޑިއާގެ ބޮޑުވަޒީރު ނަރެންދުރަ މޯދީވެސް ވަނީ ރާއްޖެއަށް ރަސްމީ ދަތުރުފުޅެއް ކުރައްވައި މި ހަރަކާތްތަކުގައި ބައިވެރިވެވަޑައިގެންފައެވެ.
