މާލޭގެ މަޖީދީމަގުގައި ހަދަމުން ދިޔަ އިމާރާތަކުން އިއްޔެ ބަޔަކު ވެއްޓުނު ހާދިސާގައި، ސަލާމަތީ ފިޔަވަޅުތައް އެޅުމުގައި އިހުމާލުވި ފަރާތްތައް 5،000 ރުފިޔާއިން ޖޫރިމަނާކޮށްފައިވާ ކަމަށް މާލެ ސިޓީ ކައުންސިލުން މިއަދު ބުނެފިއެވެ.
މި ހާދިސާގައި ޖުމްލަ ދެ މީހަކަށް އެކިވަރުގެ އަނިޔާވެގެން އައިޖީއެމްއެޗް ހޮސްޕިޓަލަށް ގެންގޮސް ފަރުވާދީފައިވެއެވެ. އަނިޔާވި މީހުންގެ ތެރޭގައި ހިމެނެނީ އުމުރުން 22 އަހަރުގެ ނޭޕާލް ފިރިހެނަކާއި، އުމުރުން 39 އަހަރުގެ ބަންގަލްދޭޝް ފިރިހެނެކެވެ.
ހޮސްޕިޓަލުން ލިބުނު ފަހުގެ މައުލޫމާތުތަކަށް ބަލާއިރު، އޭގެ ތެރެއިން އެކަކު ފަރުވާއަށްފަހު މިހާރު ވަނީ ހޮސްޕިޓަލުން ދޫކޮށްލާފައެވެ. އަދި ދެވަނަ މީހާއަށް ހޮސްޕިޓަލުގެ ވޯޑުގައި އެޑްމިޓްކޮށްގެން އަދިވެސް ދަނީ ފަރުވާ ދެމުންނެވެ.
ސިޓީ ކައުންސިލުން މިއަދު ހާމަކުރި ގޮތުގައި، މި ހާދިސާ ހިނގަން މެދުވެރިވީ އިމާރާތުގެ މަސައްކަތް ކުރަމުންދިޔައިރު ރައްކާތެރިކަމުގެ ގޮތުން އަޅަންޖެހޭ ސަލާމަތީ ފިޔަވަޅުތައް އެންމެ އެކަށީގެންވާ ގޮތެއްގައި އަޅާފައި ނުވުމުންނެވެ.
އިހުމާލުވި ފަރާތްތައް ޖޫރިމަނާކުރި ޗިޓުން އެނގޭ ގޮތުގައި، އެ ފަރާތްތަކާ މެދު ފިޔަވަޅު އަޅާފައިވަނީ އާންމު އިޖުތިމާއީ މިންގަނޑާ ޚިލާފަށް، ރައްކާތެރިކަމުގެ ފިޔަވަޅުތައް ނާޅާ މަސައްކަތް ކުރުމާ ގުޅިގެންނެވެ. 'ސަން' އިން ސުވާލުކުރުމުން ސިޓީ ކައުންސިލުން ވަނީ ޖޫރިމަނާގެ ޖުމްލަ އަދަދަކީ 5،000 ރުފިޔާކަން ކަށަވަރުކޮށްދީފައެވެ.
މި ހާދިސާއާ ގުޅިގެން ބަލަންޖެހޭ އިތުރު ކަންކަމާއި، އިމާރާތްކުރުމުގައި ހުރި ސަލާމަތީ މައްސަލަތައް ދިވެހި ފުލުހުންގެ ޚިދުމަތުން ވެސް މިހާރު ދަނީ އިތުރަށް ތަހުގީގު ކުރަމުންނެވެ.
