ބޭންކް އޮފް މޯލްޑިވްސް (ބީއެމްއެލް) ގެ އަހަރީ ޕްރޮގްރާމްގެ ދަށުން، ހިނގާބިނގާވެ އުޅުމުގައި ނުކުޅެދުންތެރިކަން ހުންނަ މީހުންނަށް އެހީތެރިވުމުގެ ގޮތުން އިތުރު 30 ފުރޮޅުލީ ގޮނޑި ހަދިޔާކޮށްފިއެވެ. މިއީ 2017 ވަނަ އަހަރު އެ ބޭންކުން ފެށި ހަރަކާތެއްގެ ދަށުން ކުރިއަށްގެންދިޔަ ހަދިޔާއެކެވެ. މި ހަރަކާތް ފެށުނު ފަހުން މިހާތަނަށް ރާއްޖޭގެ 105 އަށްވުރެ ގިނަ ރަށެއްގައި ދިރިއުޅޭ ފަރާތްތަކަށް ޖުމްލަ 360 އަށްވުރެ ގިނަ ފުރޮޅުލީ ގޮނޑި ބޭންކުގެ ފަރާތުން ފޯރުކޮށްދީފައިވެއެވެ.
ބީއެމްއެލްއިން ހާމަކުރި ގޮތުގައި، މިއަހަރު ބޭންކުން ވަނީ މި ޕްރޮގްރާމް އިތުރަށް ފުޅާކޮށް، އެކި ބޭނުންތަކަށް ބޭނުންވާ ފަރާތްތަކަށް އެހީތެރިކަން ލިބޭނެ މަގު އިތުރަށް ފަހިކޮށްދީފައެވެ. އެގޮތުން، އަމިއްލައަށް ދުއްވޭ މޮޓޮރައިޒްޑް ފުރޮޅުލީ ގޮނޑިތަކުގެ އިތުރުން، މިއަހަރު އަލަށް ޚާއްސަ މެނުއަލް ފުރޮޅުލީ ގޮނޑިތަކެއްވެސް ބޭންކުން ވަނީ ތައާރަފްކޮށްފައެވެ. މި ގޮނޑިތަކަކީ އަމިއްލައަށް ގޮނޑި ދުއްވުމުގައި ދަތިތައް ހުންނަ އަދި އެހީތެރިންނާއި އާއިލާގެ އެހީތެރިކަމާއެކު އުޅޭ ކުޑަކުދިންނާއި، ބޮޑެތި މީހުންނަށް ޚާއްސަކޮށްގެން ވަކިން ފަރުމާކޮށްފައިވާ ގޮނޑިތަކެކެވެ.
މި ޕްރޮގްރާމަކީ ބޭންކުގެ އިޖުތިމާއީ ޒިންމާގެ ދަށުން މުޖުތަމައުގެ ދުޅަހެޔޮކަމަށް ބޭންކުން ދޭ އަހައްމިއްޔަތުކަން ވަރަށް ބޮޑަށް ހާމަކޮށްދޭ ކަމެކެވެ. މީގެ ސަބަބުން ގިނަ ބައެއްގެ ދިރިއުޅުމަށް ހެޔޮ ބަދަލުތަކެއް އަންނާނެ ކަމަށް ބޭންކުން އުންމީދު ކުރެއެވެ.
މި އެހީގެ މައިގަނޑު މަގުސަދަކީ އެހީ ލިބޭ ފަރާތްތަކަށާއި އެ ފަރާތްތަކުގެ އާއިލާތަކުގެ ދިރިއުޅުމުގެ ފެންވަރު ރަނގަޅުކޮށްދިނުމެވެ. އަދި އެއްވެސް ހުރަހަކާ ނުލައި، މުޖުތަމައުގެ ތެރޭގައި މިނިވަންކަމާ އެކު އުޅުމުގެ ފުރުސަތު އެފަރާތްތަކަށް ފަހިކޮށްދިނުމެވެ.
