ސައުތެމްޕްޓަން އަތުން ހައިރާންކުރުވަނިވި ގޮތަކަށް ބަލިވެ، އެފްއޭ ކަޕުން އާސެނަލް ކެޓުމާއެކު، އެ ޓީމުން މި ސީޒަނުގައި ހަތަރު ތަށި ހޯދުމަށް ކުރި އުންމީދުތައް ފުނޑުފުނޑުވެ، މުޅި ސީޒަން ބޭކާރުވެގެން ހިނގައިދާނެކަމުގެ ބިރު ބޮޑުވެއްޖެއެވެ. އެންމެ 14 ދުވަސް ތެރޭގައި ކަރަބާއޯ ކަޕާއި އެފްއޭ ކަޕުން ވަކިވާން ޖެހުމުން، ކޯޗު މިކޭލް އާޓެޓާގެ ޓީމަށް މިހާރު އޮތް އެންމެ ބޮޑު ގޮންޖެހުމަކީ، އަނިޔާގެ މައްސަލަތަކާ އެކުވެސް ޕްރިމިއާ ލީގާއި ޗެމްޕިއަންސް ލީގުގެ ރޭހުގައި ސާބިތުވެ ތިބުމެވެ.
ރޭ ކުޅުނު ފޯރިގަދަ މެޗުގައި ސައުތެމްޕްޓަނުން އާސެނަލް ބަލިކުރީ 2-1 ގެ ނަތީޖާއަކުންނެވެ. މެޗުގެ ފުރަތަމަ ހާފުގައި ރޮސް ސްޓެވާޓް ސައުތެމްޕްޓަނަށް ލީޑު ނަގައިދީފައި ވަނިކޮށް، ބަދަލު ކުޅުންތެރިއެއްގެ ގޮތުގައި ނުކުތް ވިކްޓަ ގްޔޮކެރޭސް ވަނީ އާސެނަލްއަށް ނަތީޖާ ހަމަހަމަކޮށްދީފައެވެ. ނަމަވެސް މެޗު ނިމެން ފަސް މިނެޓަށް ވެފައި ވަނިކޮށް، ޝީ ޗާލްސް ކާމިޔާބުކުރި ލަނޑާއެކު އާސެނަލް މުބާރާތުން އަލްވަދާއު ކިޔަން ޖެހުނެވެ.
މިއީ މި ސީޒަނުގައި އާސެނަލް ޖެހިޖެހިގެން ދެ މެޗުން ބަލިވި ފުރަތަމަ ފަހަރެވެ. އަދި މިއީ 2021-22 ވަނަ އަހަރަށްފަހު ދަށް ޑިވިޝަނެއްގެ ޓީމެއް އަތުން ބަލިވެ އާސެނަލް އެފްއޭ ކަޕުން ކެޓި ފުރަތަމަ ފަހަރުވެސް މެއެވެ. އާސެނަލްގެ ކޯޗު މިކޭލް އާޓެޓާ މެޗަށްފަހު ބުނީ، ބަލިވުމުގެ ޒިންމާ ނަގަނީ އޭނާ ކަމަށެވެ. "އަހަރެންގެ ކުޅުންތެރިން މިދިޔަ ނުވަ މަސް ދުވަހު ކުރި މަސައްކަތަށް ފާޑެއް ނުކިޔާނަން. ބަލިވީމަ ޒިންމާ ނަގަން ޖެހޭނީ އަހަރެން. ކުރިއަށް މިއޮތީ ސީޒަނުގެ އެންމެ މުހިންމު ދުވަސްތައް،" އާޓެޓާ ބުންޏެވެ.
މި މެޗުގައި އާސެނަލްގެ މުހިންމު ކުޅުންތެރިން ކަމަށްވާ ޑެކްލަން ރައިސް، ބުކާޔޯ ސަކާ އަދި ލެއަންޑްރޯ ޓްރޮސާޑް އަނިޔާގެ ސަބަބުން ކުޅެފައެއް ނުވެއެވެ. މީގެ އިތުރުން ޑިފެންޑަރު ގަބްރިއެލް މަގަލްހޭސްއަށް މެޗުގެ ތެރެއިން ކަކުލަށް އަނިޔާވެ ބަދަލުކުރަން ޖެހުމަކީ އާސެނަލްއަށް ކުރިމަތިވި އިތުރު ކަންބޮޑުވުމެކެވެ.
އާސެނަލްގެ ކުރީގެ ފޯވާޑް ތިއޯ ވޮލްކޮޓް ބުނި ގޮތުގައި، އާސެނަލްއިން ސީޒަން އަތުން ބީވެގެން ދިޔަ ނުދީ ހިފަހައްޓަން ޖެހެއެވެ. އޭނާ ފާހަގަކުރި ގޮތުގައި ބެންޗުގައި ތިބި އާޓެޓާ އާއި އޮފިޝަލުންގެ ފަރާތުން ފެނުނު ހާސްކަން ކުޅުންތެރިންނަށްވެސް އަސަރުކުރިއެވެ.
އާސެނަލްއަށް ދެން އޮތީ ޕްރިމިއާ ލީގާއި ޗެމްޕިއަންސް ލީގެވެ. ނަމަވެސް ލީގުގައި މެންޗެސްޓާ ސިޓީގެ ވަރުގަދަ ވާދަވެރިކަމާ ކުރިމަތިލާން ޖެހިފައިވާއިރު، މި ފޯމުގައި ސީޒަން ނިންމާލަން ޖެހިދާނެތީ ސަޕޯޓަރުން ތިބީ ބިރުގަނެފައެވެ. ސައުތެމްޕްޓަނުން މިވަނީ އާސެނަލްއަށް އެންމެ ބޭނުންވި ވަގުތު ބޮޑު ގޮންޖެހުމެއް ކުރިމަތިކޮށްފައެވެ.
