ފީފާ ވޯލްޑް ކަޕުގެ ކުރިއަށް ހުރި މުބާރާތްތަކުން އާޖެންޓީނާއަށް ފުރުސަތު ނުދިނުމަށް ގޮވާލައި ފެށި ޕެޓިޝަނުގައި 23 މިލިއަނަށްވުރެ ގިނަ މީހުން ސޮއިކޮށްފިއެވެ.
ޕެޓިޝަން ފަށަން މެދުވެރިވި ސަބަބުތައް
އާޖެންޓީނާއައުޓް.ކޮމް މެދުވެރިކޮށް ކުރިއަށް ގެންދިޔަ މި ޕެޓިޝަނަކީ، 2026 ވަނަ އަހަރުގެ ވޯލްޑް ކަޕުގައި އާޖެންޓީނާއަށް އުސޫލުން ބޭރުން ނުހައްގު ފައިދާތަކެއް ހޯދައިދީފައިވާ ކަމަށް ބުނެ ފެށި ޕެޓިޝަނެކެވެ. މުބާރާތުގެ ގްރޫޕް ސްޓޭޖުގައި އެ ޓީމަށް ފަސޭހަ މެޗުތަކެއް ލިބުނު ކަމަށާއި، ރައުންޑް އޮފް 32 ގައި ކޭޕް ވާޑޭއާ ދެކޮޅަށް ކުޅުނު މެޗުގެ އިތުރުން ރައުންޑް އޮފް 16 ގައި މިޞްރާ ދެކޮޅަށް ކުޅުނު މެޗުގައި ރެފްރީންގެ ފަރާތުން އާޖެންޓީނާއަށް ފައިދާވާ ގޮތަށް އިންސާފުން ބޭރުން ކަންކަން ކޮށްފައިވާ ކަމަށް ގިނަ ބަޔަކު ވަނީ ތުހުމަތުކޮށްފައެވެ.
ޚާއްސަ ގޮތެއްގައި މިޞްރު މެޗުގައި އެ ޓީމުން ޖެހި ލަނޑެއް ބަލައިނުގަތުމަކީ އާޖެންޓީނާ ސަލާމަތްކުރަން ރެފްރީ ނިންމި ނިންމުމެއް ކަމަށް ވެސް މި ޕެޓިޝަނަށް ތާއީދުކުރާ މީހުން ބުނެއެވެ.
ތާރީޚީ ރެކޯޑެއް
ފުރަތަމަ 5 މިލިއަން ސޮއި ހޯދުމުގެ އަމާޒުގައި ފެށި މި ޕެޓިޝަން، ވޯލްޑް ކަޕްގެ ފައިނަލް މެޗަށްފަހު ބަންދުކުރިއިރު ޖުމްލަ 23،316،108 މީހުން ވަނީ ސޮއިކޮށްފައެވެ. މިއީ ތާރީޚުގައި ވެސް ދެވަނައަށް އެންމެ ގިނަ ބަޔަކު ސޮއިކުރި ޕެޓިޝަނެވެ. ދުނިޔޭގެ ރެކޯޑު ފޮތުން ޖާގަ ހޯދާފައިވާ އެންމެ ބޮޑު ޕެޓިޝަނުގައި ސޮއިކޮށްފައިވަނީ 24،319،181 މީހުންނެވެ.
އެހެންނަމަވެސް، މިއީ އެއްވެސް ރަސްމީ ހައިސިއްޔަތެއް ލިބިފައިވާ އަދި މިކަމުގެ ސަބަބުން އާޖެންޓީނާ މުބާރާތުން ބޭރުކުރަން ފީފާއަށް މަޖުބޫރުވާނެ ފަދަ ޕެޓިޝަނެއް ނޫންކަން ފާހަގަކޮށްލަން ޖެހެއެވެ.
ފީފާގެ ތަހުގީގު އަދި ހަމަނުޖެހުންތައް
މި ޕެޓިޝަންގެ އިތުރުން، ވޯލްޑް ކަޕުގެ ފައިނަލުގައި ސްޕެއިން އަތުން ބަލިވި މެޗަށްފަހު އާޖެންޓީނާގެ ކުޅުންތެރިންނާއި އޮފިޝަލުން ހިންގި ހަމަނުޖެހުންތަކެއްގެ މައްސަލަ ފީފާއިން އަންނަނީ ތަހުގީގު ކުރަމުންނެވެ.
