މާލެ ސަރަހައްދުގެ ދަތުރުފަތުރުގެ ނިޒާމަށް އިންގިލާބީ ބަދަލެއް ގެނައުމަށް ސަރުކާރުން ރޭ އިފްތިތާހުކުރި "މާލެ ޓެކްސީ ލައިން" ގެ ހިދުމަތް، އަންނަ ބުރާސްފަތި ދުވަހުގެ ނިޔަލަށް އެއްވެސް އަގަކާ ނުލައި ހިލޭ ދިނުމަށް އެމްޓީސީސީން މިއަދު ނިންމައިފިއެވެ.
މި ނިންމުމަކީ ހިދުމަތުގެ ފެންވަރު ވަޒަންކޮށް، އާންމުންގެ ހިޔާލާއި މަޝްވަރާގެ މަތިން ހިދުމަތް އިތުރަށް ހަރުދަނާކުރުމަށް ނިންމި ނިންމުމެއް ކަމަށް އެ ކުންފުނިން ބުނެއެވެ.
ހިދުމަތް ހޯދާނެ ގޮތާއި ފްލީޓްގެ ތަފްސީލު
ޖުމްލަ 150 ޓެކްސީއާ އެކު ފެށި މި ހިދުމަތާ ގުޅޭގޮތުން އެމްޓީސީސީން ބުނީ، ހިލޭ ދަތުރުކުރާ މުއްދަތުގައި ވެސް 1655 ހޮޓްލައިން މެދުވެރިކޮށް ދަތުރުތައް ބުކް ކުރެވޭނެ ކަމަށެވެ. މި ހިދުމަތުގައި ތިން މޮޑެލްއެއްގެ ކާރު ބޭނުންކުރެއެވެ:
-
ލުމިން: މާލެ ތެރޭގެ ކުރު ދަތުރުތަކަށް ހާއްސަ ކުދި ކާރު.
-
ޑީޕަލް އެސް5: މާލެ، ހުޅުމާލެ އަދި އެއާޕޯޓް ދަތުރުތަކަށް ހާއްސަ ކާރު.
-
ޑީޕަލް އެސް7: ހަތަރު ފަސިންޖަރުންގެ ޖާގަ ހިމެނޭ ތަނަވަސް ކާރު.
ޒަމާނީ ނިޒާމެއް
ސަރުކާރުގެ ޓެކްސީ ލައިން ބިނާވެފައިވަނީ ޑިޖިޓަލް ބުކިން ސިސްޓަމެއްގެ މައްޗަށެވެ. ހިލޭ ދަތުރުކުރާ މުއްދަތު ހަމަވުމުން، ދަތުރުތަކަށް ފައިސާ ދެއްކުމުގައި އޮންލައިން ޕޭމަންޓްގެ ފަސޭހަކަން ލިބިގެންދާނެއެވެ.
"މި މުއްދަތުގައި އަޅުގަނޑުމެން އެދެނީ ކަސްޓަމަރުންގެ ހިޔާލު ލިބުން. އެ ހިޔާލުތަކަށް ބިނާކޮށް ހިދުމަތް އިތުރަށް ފުރިހަމަކުރާނެ ކަމުގެ ޔަގީންކަން އަރުވަން،" އެމްޓީސީސީގެ ނޯޓިހުގައި ބުނެފައިވެއެވެ.
ދާއިމީކޮށް ހިދުމަތް ފެށުމުން، ދަތުރުތަކަށް އަގު ނަގާނީ ޓްރާންސްޕޯޓް މިނިސްޓްރީން ކަނޑައަޅާފައިވާ ރަސްމީ ރޭޓްތަކާ އެއްގޮތަށެވެ. މި އާ ހިދުމަތުގެ ސަބަބުން މާލެ ސަރަހައްދުގައި ޓެކްސީ ހޯދުމަށް އާންމުން އުފުލަމުންދާ ތަކްލީފަށް ބޮޑު ހައްލެއް ލިބިގެންދާނެ ކަމަށް ސަރުކާރުން އުންމީދު ކުރެއެވެ.
