ދިވެހިރާއްޖޭގެ މަސްވެރިކަމާއި ކަނޑުގެ ވަސީލަތްތައް ދެމެހެއްޓެނިވި ގޮތެއްގައި ބެލެހެއްޓުމާއި ތަރައްޤީކުރުމަށްޓަކައި، މަސްވެރިކަމާއި ކަނޑުގެ ވަސީލަތްތަކުގެ ވުޒާރާއިން 20 އަހަރުގެ މާސްޓަރ ޕްލޭނެއް (2025-2045) އެކުލަވާލުމުގެ މަސައްކަތް ފަށައިފިއެވެ. މި މަސައްކަތުގެ ފުރަތަމަ ބައެއްގެ ގޮތުން، މާސްޓަރ ޕްލޭނާ ގުޅޭގޮތުން މަޝްވަރާ ކުރުމުގެ ބައްދަލުވުމެއް ވަނީ ބާއްވާފައެވެ.
މި ބައްދަލުވުމުގައި ކަމާބެހޭ ވުޒާރާތަކާއި، ސަރުކާރުގެ އިދާރާތަކާއި، އަމިއްލަ ވިޔަފާރިތަކާއި، އަދި އަމިއްލަ ޖަމްޢިއްޔާތަކުގެ މަންދޫބުން ބައިވެރިވެފައިވެއެވެ. ބައްދަލުވުމުގެ މައިގަނޑު މަޤްޞަދަކީ، މަސްވެރިކަމާއި ކަނޑުގެ ވަސީލަތްތަކުގެ ދާއިރާގައި ހުރި މައިގަނޑު އިސްކަންދޭންޖެހޭ ކަންކަމާއި، ކުރިމަތިވެފައިވާ ގޮންޖެހުންތަކާއި، އަދި ހުރި ފުރުޞަތުތަކާ ގުޅޭގޮތުން ހިޔާލު ބަދަލުކޮށް މަޝްވަރާ ކުރުން ކަމަށް މިނިސްޓްރީން މައުލޫމާތުދެއެވެ.
މި މާސްޓަރ ޕްލޭނަކީ، މި ދާއިރާގެ ކުރިމަގު ބައްޓަންކުރުމަށާއި، ދެމެހެއްޓެނިވި ގޮތެއްގައި ބޭނުންކުރުމަށް ބޭނުންވާ ސްޓްރެޓެޖިކް އޮނިގަނޑެއްގެ ގޮތުގައި ޚިދުމަތްކުރާނެ ފުރިހަމަ އަދި ކުރިމަގަށް ބަލާ އެކުލަވާލެވޭ ރޭވުމަކަށް ވާނެ ކަމަށެވެ.
މި ފުރަތަމަ މަޝްވަރާ ބައްދަލުވުމުގެ ސަބަބުން، މާސްޓަރ ޕްލޭނަށް ބޭނުންވާ މުހިންމު ޚިޔާލުތަކާއި ލަފާތައް ލިބި، ދާއިރާގެ އެންމެހާ ފަރާތްތަކުގެ ބައިވެރިވުމާއެކު ދިވެހިރާއްޖޭގެ މަސްވެރިކަމުގެ ސިނާއަތާއި ކަނޑުގެ ވަސީލަތްތައް ކުރިއަރުވައި، ދިގު މުއްދަތަށް ފައިދާހުރި ގޮތެއްގައި ބެލެހެއްޓުމަށް ބޮޑު އެހީތެރިކަމަކަށް ވެގެންދާނެ ކަމަށް ލަފާކުރެވެއެވެ. ކުރިއަށް އޮތްތަނުގައިވެސް މިފަދަ މަޝްވަރާ ބައްދަލުވުންތައް ބޭއްވުމަށް ވަނީ ރާވާފައެވެ.
ރިއެކްޓް އަދި ކޮމެންޓް ކުރެއްވުމަށް
