ލޭބަރ ފޯސް ސާރވޭގެ ފީލްޑް މަސައްކަތް މިއަދުން ފެށިގެން މާލެއާއި ވިލިމާލޭގެ އިތުރުން ހުޅުމާލޭގައި ކުރިއަށްގެންދިއުމަށް ހަމަޖެހިފައިވާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް (އެމް.ބީ.އެސް) އިން ބުނެފިއެވެ.
އެގޮތުން، މި ސާރވޭގެ މަސައްކަތް މާލެ ސަރަހައްދުގައި ކުރިއަށްދާނީ އެޕްރީލް 20 އިން ފެށިގެން 26 ގެ ނިޔަލަށްކަމަށްވާއިރު ސާރވޭ ކުރިއަށްގެންދާނީ ރެންޑަމްކޮށް ހޮވާލެވިފައިވާ ގޭބިސީތަކުގައި ކަމަށް އެމް.ބީ.އެސް އިން ބުނެއެވެ.
އަދި މި ސާރވޭގެ ތެރެއިން ހޯދާނީ ތަޢުލީމާއި، ހިޖުރަކުރުމާއި، ވަޒީފާއާއި އާމްދަނީ ހޯދުމުގެ މަސައްކަތްކުރާ އާބާދީގެ ތަފްޞީލާއި، މީހުންގެ އާންމު މަޢުލޫމާތާއި، ހިލޭ ސާބަހަށް މަސައްކަތްކުރާ އާބާދީގެ ތަފްޞީލާއި، ގޭތެރޭގެ މަސައްކަތުގައި ވަގުތު ހޭދަކުރާ މިންވަރުގެ އިތުރުން އާމްދަނީ ލިބޭ މަސައްކަތް ހޯދާ އަދި ލިބިފައިނުވާ އަބާދީގެ ތަފްޞީލާ ގުޅޭ މަޢުލޫމާތުކަމަށާއި، މި ސާރވޭ އަށް ހޮވޭ ގޭބިސީތަކަށް އެއް ފަހަރަށްވުރެ ގިނަ ފަހަރުވެސް ޒިޔާރަތްކޮށްފާނެ ކަމަށާއި، މި މަޢުލޫމާތުތަކަކީ މުހިންމު ނިންމުމަށް ބޭނުންކުރެވޭނެ މަޢުލޫމާތު ކަމަށްވުމާއެކު، މި ސާރވޭއަށް ގޭބިސީތަކުން އެއްބާރުލުން ދެއްވުމަށް އެމް.ބީ.އެސް އިން ވަނީ އެދިފައެވެ.
ލޭބަރ ފޯސް ސާރވޭގެ މައިގަނޑު މަޤުޞަދުތަކުގެ ތެރޭގައި އިޤުތިޞާދީ ގޮތުން ހަރަކާތްތެރިވާ އާބާދީ ދެނެގަތުމާއި، ލޭބަރ ފޯސް ޕާޓިސިޕޭޝަން ރޭޓް ދެނެގަތުމާއި، އަލަށް ވަޒީފާ އުފެދޭވަރު ދެނެގަތުމުގެ އިތުރުން އެމްޕްލޮއިމަންޓް އަދި އަންއެމްޕްލޮއިމަންޓް ރޭޓް ދެނެގަތުން ހިމެނެއެވެ.
ހަމައެއާއެކު، ހިޖުރަކުރުމުގެ ރޭޓު ހޯދައި އާބާދީގެ ޕްރޮޖެކްޝަންސްތައް އަދާހަމަކުރުމަށް ބޭނުންވާ ޑޭޓާ ހޯދުމާއި، "ޑީސެންޓް ޖޮބްސް އިންޑިކޭޓަރ" އެކުލަވާލުމަށް ބޭނުންވާ ޑޭޓާ ހޯދުން އަދި ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުވާ މިންވަރު ދެނެގަތުމަކީވެސް މި ސާރވޭގެ މަޤުޞަދުތަކުގެ ތެރޭގައި ހިމެނޭ ކަންތައްތަކެވެ.
ރިއެކްޓް އަދި ކޮމެންޓް ކުރެއްވުމަށް
