ޗައިނާއިން އީރާނަށް ހަތިޔާރު ފޮނުވުމަށް ތައްޔާރުވަމުންދާކަމަށް އެމެރިކާގެ ޖާސޫސީ އިދާރާތަކުން ދައްކާކަމަށް މަސްދަރުތަކާ ހަވާލާދީ ސީއެންއެންއިން ރިޕޯޓްކޮށްފި އެވެ.
އެމެރިކާގެ އިންޓެލިޖެންސްގެ އެންމެ ފަހުގެ މަޢުލޫމާތު އެނގޭ ތިން މީހަކު ބުނި ގޮތުގައި، ކުރިއަށް އޮތް މަދު ހަފުތާތަކެއްގެ ތެރޭގައި ޗައިނާއިން އީރާނަށް ވައިގެ ދިފާއީ އާ ނިޒާމުތަކެއް ފޯރުކޮށްދިނުމަށް ދަނީ ތައްޔާރުވަމުންނެވެ.
މިއީ ވަރަށް ބޮޑު ނުތަނަވަސްކަމެއް އުފެދިދާނެ ފިޔަވަޅެކެވެ. ސަބަބަކީ، މި ހަފުތާގެ ކުރީކޮޅު އީރާނާއި އެމެރިކާއާ ދެމެދު ހިނގަމުންދިޔަ ހަނގުރާމަ މެދުކަނޑާލުމަށް އެކުލަވައިލި ނާޒުކު ސުލްހައިގެ އެއްބަސްވުން މެދުވެރިއެއްގެ ދައުރު އަދާކޮށްގެން ހާސިލުކޮށްދިނީ ޗައިނާ ކަމަށް އެ ގައުމުން ބުނެފައިވާތީއެވެ.
މީގެ އިތުރުން، ރައީސް ޑޮނަލްޑް ޓްރަމްޕް އަންނަ މަހުގެ ކުރީކޮޅު ޗައިނާގެ ރައީސް ޝީ ޖިންޕިންއާ ބައްދަލުކުރެއްވުމަށް އެ ގައުމަށް ޒިޔާރަތްކުރެއްވުމަށް ވެސް ވަނީ ހަމަޖެހިފައެވެ.
މި އިންޓެލިޖެންސް ރިޕޯޓުތަކުން ހާމަވާ ގޮތުގައި، އީރާނުން މި ސުލްހައިގެ ފުރުސަތުގެ ބޭނުން ހިފައި، ބޭރުގެ މުހިންމު ބައިވެރިންގެ އެހީތެރިކަމާއެކު ވަކި ބާވަތްތަކެއްގެ ހަތިޔާރުގެ ނިޒާމުތައް އިތުރުކުރަމުންދާކަން ފާހަގަކުރެވެއެވެ.
ދެ މަސްދަރަކާ ހަވާލާދީ ސީއެންއެން ރިޕޯޓްކުރި ގޮތުގައި، މި ހަތިޔާރުތައް ފޮނުވަނީ ކޮން ގައުމަކުންކަން އޮޅުވާލުމަށްޓަކައި، ތިންވަނަ ގައުމުތަކެއް މެދުވެރިކޮށް އެ ތަކެތި ފޮނުވުމަށް ޗައިނާއިން މަސައްކަތްކުރާ ކަމުގެ ނިޝާންތައް ވަނީ ފެނިފައެވެ.
ޗައިނާއިން ފޮނުވުމަށް ތައްޔާރުވަމުންދަނީ ކޮނޑަށްލައިގެން ފޮނުވާލެވޭ ވައިގެ ދިފާއީ މިސައިލް ނިޒާމުތަކެއް ކަމަށްވާ 'މޭންޕެޑްސް' (MANPADs) ކަމަށް މަސްދަރުތަކުން ބުނެއެވެ.
މިއީ ފަސް ހަފުތާގެ ހަނގުރާމައިގެ ތެރޭގައި ތިރިން އުދުހޭ އެމެރިކާގެ އަސްކަރީ މަތިންދާބޯޓުތަކަށް ބޮޑު ނުރައްކަލެއް ކުރިމަތިކުރުވި ހަތިޔާރެކެވެ. އަދި ސުލްހައިގެ އެއްބަސްވުން އުވާލައިފިނަމަ، އަނެއްކާވެސް މި ނުރައްކާ ކުރިމަތިވެދާނެއެވެ.
ވޮޝިންގްޓަންގައި ހުންނަ ޗައިނާ އެމްބަސީގެ ތަރުޖަމާނަކު ވިދާޅުވީ، "ޗައިނާއިން ދުވަހަކުވެސް ހަނގުރާމައިގެ އެއްވެސް ފަރާތަކަށް ހަތިޔާރު ފޯރުކޮށްދީފައެއް ނުވާނެ؛ ތިޔަ ދެކެވޭ ވާހަކަތަކަކީ ހަގީގަތާ ހިލާފު ވާހަކަތަކެއް،" ކަމަށެވެ.
"ޒިންމާދާރު ބޮޑު ގައުމެއްގެ ހައިސިއްޔަތުން، ޗައިނާއިން އަބަދުވެސް ދަނީ ބައިނަލްއަގުވާމީ ޒިންމާތައް އަދާކުރަމުން. އަސާސެއް ނެތް ތުހުމަތުތައް ކުރުމާއި، ނުބައި ނިޔަތެއްގައި ކަންކަން ގުޅުވުމާއި، އަދި ކަންކަން ބޮޑުކޮށްގެން ދެއްކުމުން އެމެރިކާ ދުރުހެލިވުމަށް އަޅުގަނޑުމެން ގޮވާލަން. އަދި ކަމާބެހޭ ފަރާތްތަކުން މަސްލަހަތު ފިނިކުރުމަށް އިތުރު މަސައްކަތްތަކެއް ކުރާނެ ކަމަށް އުންމީދުކުރަން."
