ޗައިނާގެ ސަންޔާގައި މިހާރު ކުރިއަށްދާ 6 ވަނަ އޭޝިއަން ބީޗް ގޭމްސްގެ ބީޗް ހޭންޑްބޯޅަ އިވެންޓުގައި ރާއްޖޭގެ ގައުމީ ފިރިހެން ޓީމު ކުޅުނު ފުރަތަމަ މެޗުން ބަންގްލަދޭޝްގެ މައްޗަށް ކުރިހޯދައިފިއެވެ. ރާއްޖެއިން މި މެޗު ކާމިޔާބުކުރީ 2-1 ސެޓުންނެވެ. މެޗުގެ ފުރަތަމަ ސެޓުގައި ބަންގްލަދޭޝްއިން ވަނީ މޮޅު ކުޅުމެއް ދައްކައި 12-21 އިން ސެޓު ގެންގޮސްފައެވެ. ނަމަވެސް، ދެވަނަ ސެޓުގައި ރާއްޖޭގެ ޓީމުން ވަނީ ކުޅުން ރަނގަޅުކޮށް، 26-23 އިން ސެޓު ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ.
މި މެޗުގައި ރާއްޖޭގެ މުހައްމަދު ޝަމްނޫޒް ނައީމް 14 ގޯލް ޖެހިއިރު، ތަޖުރިބާކާރު ކުޅުންތެރިޔާ ފަތުހުﷲ އާދަމް ވަނީ 10 ގޯލް ހަމަކޮށްފައެވެ. މެޗުގެ ނަތީޖާ ނެރުމަށް ޖެހި ޕެނަލްޓީ ޝޫޓްއައުޓް ރާއްޖެއިން ކާމިޔާބުކުރީ 7-4 އިންނެވެ. ޕެނަލްޓީގައި ރާއްޖޭގެ ކީޕަރު އަހުމީމް އަލީ ވަނީ މުހިންމު ސޭވްތަކެއް ކޮށް، ޓީމު މޮޅުކޮށްދިނުމުގައި ބޮޑު ދައުރެއް އަދާކޮށްފައެވެ.
މި މުބާރާތުގައި ރާއްޖެ ހިމެނެނީ ވަރުގަދަ ގައުމުތަކަކާއެކު ގްރޫޕް ބީގައެވެ. މި ގްރޫޕުގައި ރާއްޖެއާއެކު ދެން ހިމެނެނީ އޮމާން، ޕާކިސްތާން، ޖޯޑަން، ބަންގްލަދޭޝް، ތައިލެންޑް، ގަތަރު އަދި މޮންގޯލިއާއެވެ. މިއަދުގެ ކާމިޔާބީއަށްފަހު ރާއްޖޭގެ ޓީމަށް ކުރިއަށް އޮތީ ބުރަ ތާވަލެކެވެ. ރާއްޖެ ގަޑިން މިއަދު 14:00 ގައި ޖޯޑަންއާ ދެކޮޅަށް ރާއްޖެ ނުކުންނާނެއެވެ.
އޭޝިއަން ބީޗް ގޭމްސްގައި ރާއްޖެއިން މިއަހަރު ހަތަރު ކުޅިވަރެއްގައި ވާދަކުރެއެވެ. އެއީ ބީޗް ހޭންޑްބޯޅައިގެ އިތުރުން އެތުލެޓިކްސް، ސްވިމިން އަދި ވޮލީބޯޅައެވެ. މި މުބާރާތަށް ތައްޔާރުވުމުގެ ގޮތުން ހޭންޑްބޯޅަ ޓީމުން ވަނީ ތައިލެންޑުގައި ތަމްރީނު ކޭމްޕެއްވެސް ފުރިހަމަކޮށްފައެވެ.
