އެމެރިކާ އާއި އިޒްރޭލުން އީރާނަށް ދެމުންދާ ހަމަލާތަކާއި، އެ ގައުމުތަކުގެ މެދުގައި ހިނގަމުންދާ ހަނގުރާމައިގެ ނުތަނަވަސްކަމުގެ ތެރޭގައި ވެސް، މިއަހަރުގެ ދުނިޔޭގެ ފުޓްބޯޅަ މުބާރާތުގައި އީރާނުން ބައިވެރިވާނެ ކަމުގެ ފުރިހަމަ ޔަގީންކަން ފީފާގެ ރައީސް ޖިއާނީ އިންފަންޓީނޯ ދެއްވައިފި އެވެ.
ބުދަ ދުވަހު އެމެރިކާގައި ބޭއްވި އިގްތިސާދީ ފޯރަމެއްގައި ވާހަކަދައްކަވަމުން އިންފަންޓީނޯ ވިދާޅުވީ، ސިޔާސީ އަދި އަސްކަރީ ހަމަނުޖެހުންތަކެއް ހުރި ނަމަވެސް، އީރާނުގެ ގައުމީ ޓީމު މުބާރާތަށް އަންނާނެ ކަމަށެވެ.
"އީރާނުގެ ޓީމު ޔަގީނުން ވެސް އަންނާނެ. އަހަރެމެންގެ އުންމީދަކީ މުބާރާތް ފެށޭއިރު މަޝްރަހު އަމާންވުން. އެހެންނަމަވެސް، އީރާނުން ބައިވެރިވާން ޖެހޭނެ. އެމީހުން ތަމްސީލުކުރަނީ އެ ގައުމުގެ ރައްޔިތުން. އެމީހުން ވަނީ މުބާރާތަށް ކޮލިފައިވެފައި، އަދި ކުޅުންތެރިން ތިބީ ކުޅެން ބޭނުންވެފައި،" އިންފަންޓީނޯ ވިދާޅުވި އެވެ.
މީގެ ދެ ހަފުތާ ކުރިން ތުރުކީގައި އީރާނުގެ ޓީމާ ބައްދަލުކުރެއްވި އިންފަންޓީނޯ އިތުރަށް ވިދާޅުވީ، ކުޅިވަރަކީ ސިޔާސީ ކަންކަމާ ދުރުގައި ބާއްވަންޖެހޭ އެއްޗެއް ކަމަށާއި، ފީފާގެ މަގްސަދަކީ ގައުމުތަކުގެ މެދުގައި ގުޅުން ބަދަހިކޮށްދިނުން ކަމަށެވެ.
އެމެރިކާ، ކެނެޑާ އަދި މެކްސިކޯގައި ބާއްވާ މި މުބާރާތުގައި އީރާނުން ކުޅެން ހަމަޖެހިފައިވަނީ ގްރޫޕް މަރުހަލާގަ އެވެ. އެ ޓީމުގެ ފުރަތަމަ ދެ މެޗު ކެލިފޯނިއާގައި ކުޅޭއިރު، ތިންވަނަ މެޗު ކުޅުމަށް ހަމަޖެހިފައިވަނީ ސިއެޓްލްގަ އެވެ.
އީރާނުގެ ބައިވެރިވުމާ މެދު ސުވާލު އުފެދުނީ، އެމެރިކާގެ ރައީސް ޑޮނަލްޑް ޓްރަމްޕް، ސަލާމަތީ ސަބަބުތަކަށްޓަކައި އީރާނުގެ ޓީމު މުބާރާތަށް އައުމަށް ހިތްވަރު ނުދެއްވާނެ ކަމަށް ވިދާޅުވުމާ ގުޅިގެންނެވެ. އަދި އީރާނުގެ ބައެއް އިސްވެރިން ވެސް ވަނީ އެމެރިކާއަށް ދަތުރުކުރުމާ މެދު ދެބަސްވުން ހުރި ކަމަށް އިޝާރާތްކޮށްފަ އެވެ. ނަމަވެސް، ފީފާގެ ރައީސްގެ މި ވާހަކަތަކާއެކު އީރާނު މުބާރާތުގައި ފެންނާނެކަން މިހާރު ވަނީ ކަށަވަރުވެފަ އެވެ.
