ވިއްކަން ބަހައްޓާފައި ހުންނަ މުދަލުގައި އަގު ޖަހާފައި ހުރިތޯ ބެލުމަށް އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވުޒާރާއިން ކުރިއަށްގެންދާ އިންސްޕެކްޝަންތަކުގެ ތެރެއިން މިދިޔަ ހަފުތާގައި (އޮކްޓޫބަރު 15 އިން 20 އަށް) 34 ފިހާރައެއް ބަލައި ފާސްކޮށްފިއެވެ.
އެ ވުޒާރާއިން ހާމަކުރި ގޮތުގައި، އިންސްޕެކްޓް ކުރެވުނު ތަންތަނުގެ ތެރެއިން 17 ފިހާރައެއްގައި ޤާނޫނާ އެއްގޮތަށް މުދަލުގައި އަގު ޖަހާފައިވާއިރު، އަގު ޖަހާފައިނުވާ 17 ފިހާރައަކަށް ވަނީ އިސްލާހުކުރުމަށް އަންގާ ނޯޓިސް ދީފައެވެ.
ޤާނޫނީ މިންގަނޑުތަކާއި ފިޔަވަޅުތައް:
-
ޤާނޫނީ ލާޒިމުކަން: ކޮންސިއުމަރ ޕްރޮޓެކްޝަން އެކްޓް (މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ޙިމާޔަތްކުރުމުގެ ޤާނޫނު) ގެ 16 ވަނަ މާއްދާގެ (ހ) ގެ ދަށުން، ވިއްކާ މުދަލުގެ އަގު ސާފުކޮށް އެނގެން ނެތްނަމަ އެ މުދަލެއް ވިއްކަން ބެހެއްޓުމަކީ މަނާކަމެކެވެ.
-
އަގު ޖެހުމުގެ މިންގަނޑު: ސީދާ މުދަލުގައި އަގު ލިޔެ/ޕްރިންޓްކޮށްފައި ހުރުން ނުވަތަ މުދާ ބަހައްޓާފައި ހުރި ތަނުގައި ކޮން މުދަލެއްގެ އަގެއްކަން އެނގޭގޮތަށް އަގު ހަރުކޮށްފައި ހުރުން.
-
ފިޔަވަޅު އަޅާނެކަމުގެ އިންޒާރު: ޤާނޫނުގެ 66 ވަނަ މާއްދާގެ ދަށުން މޮނިޓަރކޮށް، ގަވާއިދާ ހިލާފަށް އަގު ނުޖަހައި ވިޔަފާރިކުރާ ފަރާތްތަކާމެދު ޤާނޫނުގެ 84 ވަނަ މާއްދާގެ ދަށުން ފިޔަވަޅު އަޅަމުންދާނެއެވެ.
މީގެއިތުރުން، އަސާސީ ކާބޯތަކެތީގެ އަގުތައް އާންމުންނަށް އެއްތަނަކުން ފަސޭހައިން ބަލާލެވޭނެ ގޮތް ހެދުމަށް "އަގުމަގު ޕޯޓަލް" ލޯންޗްކޮށްފައިވާއިރު، މިހާތަނަށް 224 ފިހާރައެއް އެ ޕޯޓަލްގައި ރަޖިސްޓްރީކޮށްފައިވާކަމަށް އިޤްތިޞާދީ ވުޒާރާއިން މައުލޫމާތުދެއެވެ.
