ނިމިދިޔަ އިންތިޚާބަކީ ކުރަންވީ ކަމާއި ދާންވީ މަގު ސާފުކޮށްދިން މުހިއްމު އިންތިޚާބެއް ކަމަށާއި، ރައްޔިތުންގެ ވިންދާ އެއްގޮތަށް ސަރުކާރުން އިސްލާހުކުރަންޖެހޭ ކަންކަން ރަނގަޅުކުރައްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދެއްވާފައިވާ ކަމަށް ފިޝަރީޒް މިނިސްޓަރު އަދި ޕީއެންސީގެ ނައިބު ރައީސް އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިއަދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ސިޔާސީ ޕާޓީއެއްގެ އެންމެ ބޮޑު މަގުސަދަކީ އިންތިޚާބުތަކުގައި ބައިވެރިވެ ކާމިޔާބު ހޯދުން ކަމަށްވީ ނަމަވެސް، އިންތިޚާބެއްގެ ނަތީޖާއަކީ އަބަދުވެސް ކަންކަމާ މެދު ފުންކޮށް ވިސްނައި އިސްލާހީ ފިޔަވަޅު އެޅުމަށް ލިބޭ ފަހި ފުރުސަތެއް ކަމަށެވެ. އަދި ޕީއެންސީއަކީ އަބަދުވެސް ކުރިއަށް ވިސްނާ ބައެއްކަން އޭނާ ފާހަގަކުރެއްވިއެވެ.
ޝިޔާމް ވިދާޅުވި ގޮތުގައި، އިންތިޚާބުގެ ނަތީޖާއަށްފަހު ވެސް ރައީސް މުއިއްޒު ދައްކަވާފައިވަނީ ޑިމޮކްރަސީގެ ރިވެތި ނަމޫނާއެކެވެ. ސަރުކާރު ދެމިއޮންނާނީ ރައްޔިތުން އެދޭ ބަދަލުތަކާއެކު ހެޔޮ ވެރިކަމެއް ކޮށްދިނުމުގައި ކަމަށާއި، ރައްޔިތުންގެ ވިންދާ އެއްގޮތަށް ރަނގަޅުކުރަންޖެހޭ ކަންކަން ސަރުކާރުން ކުރައްވާނެ ކަމުގެ ފުރިހަމަ ޔަގީންކަން ރައީސް ވަނީ ދެއްވާފައެވެ.
މި އިންތިޚާބުގައި ގޮނޑިތައް ކާމިޔާބުކުރެއްވި ހުރިހާ ކެންޑިޑޭޓުންނަށް މަރުހަބާ ދަންނަވަމުން، ކާމިޔާބީއާ ހަމައަށް ވާސިލްނުވެވުނު ކެންޑިޑޭޓުން ދެއްކެވި ހިތްވަރަށް ވެސް ޝިޔާމް ވަނީ ސާބަސް ދެއްވާފައެވެ. މީގެ އިތުރުން، އިންތިޚާބުގެ ކެމްޕޭންގައި ރައީސް މުއިއްޒު އާއި ފަސްޓް ލޭޑީ ސާޖިދާ މުޙައްމަދު ދެއްކެވި އާދަޔާޚިލާފު ހިތްވަރާއި ނަމޫނާއަށް ޝިޔާމް ވަނީ ހާއްސަ ޝުކުރެއް އަދާކުރައްވާފައެވެ.
މި ބަޔާނަކީ އިންތިޚާބުގެ ނަތީޖާއަށްފަހު ރައްޔިތުންގެ އަޑުއަހައި، ސަރުކާރުގެ ހިނގުން އިތުރަށް ހަރުދަނާކުރުމުގެ ރޫހު އާލާކުރުމަށް ޝިޔާމް ދެއްވި މުހިއްމު މެސެޖެކެވެ.
