ގައުމީ ފުޓުބޯޅަ ޓީމުގެ ކޯޗުކަމާ ތިންވަނަ ފަހަރަށް ހަވާލުވި އިސްތުވާން އުރްބާނީ، އޭނާގެ ފުރަތަމަ އިމްތިހާނަށް މިއަދު ނުކުންނައިރު، އެންމެ ބޮޑު ސަމާލުކަމެއް ހުއްޓިފައިވަނީ އޭނާ ހޮވާފައިވާ "އުމުރުން ދޮށީ" ސްކޮޑަށެވެ. މިއަދު ހަވީރު އޭޝިއަން ކަޕް ކޮލިފައިންގައި ޓިމޯ ލެސްޓޭއާ ދެކޮޅަށް ރާއްޖެ ނުކުންނައިރު، ޓީމުގެ އެވްރެޖް އުމުރަކީ 32 އަހަރެވެ. މިއީ ފާއިތުވި ހަތް އަހަރު ތެރޭގައި ގައުމީ ޓީމަކުން ފެންނަ އެންމެ ދޮށީ އުމުރުގެ ސްކޮޑެވެ.
ތަޖުރިބާކާރުން ނެގީ ކީއްވެ؟
ސްކޮޑުގެ އުމުރާ ބެހޭގޮތުން އުފެދުނު ސުވާލުތަކަށް ޖަވާބު ދެމުން އުރްބާނީ ބުނީ، މިއީ ވަރަށް ބޮޑަށް ރޭވިގެން ނިންމި ނިންމުމެއް ކަމަށެވެ. އޭނާގެ ބޭނުމަކީ އޭނާގެ ކުޅުމުގެ ފަލްސަފާ ދަނޑުމަތީގައި ތިބެގެން އާ ކުޅުންތެރިންނަށް ދަސްކޮށްދޭނެ "މުދައްރިސުން" ތަކެއް އުފެއްދުމެވެ.
"އަހަރެން ބޭނުންވަނީ އަހަރެންގެ ސްޓައިލް އާ ޖީލަށް ބުނެދޭން. އެކަން އެންމެ ރަނގަޅަށް ކުރެވޭނީ ކުރިން ވެސް އަހަރެންގެ އިރުޝާދުގެ ދަށުން ކުޅެ، އެ ތަޖުރިބާ އަމަލީގޮތުން ކޮށްފައިވާ ކުޅުންތެރިންނަށް،" އުރްބާނީ ބުންޏެވެ.
ޒުވާން ޖީލަށް އޮތް ފުރުސަތު
މި މަހަކީ އުރްބާނީއަށް ވަރަށް ބިޒީ މަހެކެވެ. ރާއްޖޭގައި މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕް ގައި ވާދަކުރާ ޓީމާއެކު އޭނާ ވަނީ ފަސް މެޗެއްގައި އިރުޝާދު ދީފައެވެ. ސީނިއާ ޓީމަށް މިހާރު ކުޅެމުން އަންނަ މުހައްމަދު އިލާން އިމްރާނާއި އީތަން އިބްރާހިމް ޒަކީ ފަދަ ޒުވާން ތަރިން މިފަހަރުގެ ސީނިއާ ސްކޮޑުން ނުފެނުނަސް، އުރްބާނީ ބުނީ އެ ކުޅުންތެރިންނަށް ފުރުސަތު ބަންދުނުވާ ކަމަށެވެ.
-
އިލާން އިމްރާން: 20 އަހަރުން ދަށުގެ ސާފް މުބާރާތުގައި 3 ގޯލު ޖަހައިގެން މިވަގުތު އެންމެ ގިނަ ގޯލު ޖެހި ކުޅުންތެރިންގެ ލިސްޓުގެ ކުރީގައި.
-
ފޯ ނޭޝަންސް ކަޕް: އަންނަ ޖޫން މަހު މާލޭގައި ބާއްވާ "ޑައިމަންޑް ޖުބިލީ" މުބާރާތުގައި ޒުވާން ކުޅުންތެރިންނަށް ސީނިއާ ޓީމުން ފުރުސަތު ދޭނެކަމުގެ ޔަގީންކަން ކޯޗު ވަނީ ދީފައެވެ.
ކުރިއަށް އޮތީ ބޮޑު އީދެއް
ދިވެހި ފުޓުބޯޅައަށް 75 އަހަރު ފުރުން ފާހަގަކުރުމަށް އެފްއޭއެމް އިން އަންނަނީ ޑައިމަންޑް ޖުބިލީ ފޯ ނޭޝަންސް ކަޕް އަށް ތައްޔާރުވަމުންނެވެ. ޖޫން 1 އިން 10 އަށް މާލޭގައި ބާއްވާ މި މުބާރާތުގައި ރާއްޖޭގެ އިތުރުން ސްްރީލަންކާ، ބަންގްލަދޭޝް އަދި ނޭޕާލް ވާދަކުރާނެއެވެ.
މިއަދުގެ މެޗަކީ އުރްބާނީގެ ތިންވަނަ ދައުރުގެ ފެށުމެވެ. ތަޖުރިބާކާރުންގެ "ބެލެނިވެރިކަމުގައި" ނުކުންނަ މި ޓީމުން ދިވެހި ސަޕޯޓަރުން އުއްމީދު ކުރަނީ އާ ރޫހެއްގައި ފުޓުބޯޅަ އަލުން ދިރިގެންދާނެ ކަމަށެވެ.
