ދުނިޔޭގެ ބާޒާރުގައި ތެލުގެ އަގު އުފުލި، ސަޕްލައިއަށް ބައެއް ގޮންޖެހުންތައް ކުރިމަތިވެފައިވީ ނަމަވެސް، ރާއްޖެއަށް ބޭނުންވާ ތެޔޮ މެދުނުކެނޑި ލިބޭނެ އިންތިޒާމު ހަމަޖެހިފައިވާ ކަމަށް ސަރުކާރުން ބުނެފި އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ފިނޭންސް މިނިސްޓަރު މޫސާ ޒަމީރު ވިދާޅުވީ، އެސްޓީއޯއިން އޯޑަރުކޮށްފައިވާ ތެލުގެ ދެ ޝިޕްމަންޓެއް ކުރިއަށް އޮތް ހަފުތާގެ ތެރޭގައި ރާއްޖެއަށް ބޭރުން އަންނާނެ ކަމަށެވެ.
ތެޔޮ އަންނާނެ ތާރީޚުތަކާއި ގައުމުތައް:
- ސިންގަޕޫރުން: އޭޕްރީލް 2 ނުވަތަ 3 ވަނަ ދުވަހު ޝިޕްމަންޓެއް އަންނާނެ.
- އޮމާނުން: އޭޕްރީލް 4 ނުވަތަ 5 ވަނަ ދުވަހު އިތުރު ޝިޕްމަންޓެއް އަންނާނެ.
މިނިސްޓަރު ޒަމީރު ފާހަގަކުރެއްވި ގޮތުގައި، ދުނިޔޭގެ ބާޒާރުގައި ތެލުގެ އަގު 160 ޑޮލަރާ ގާތްކުރާ މިންވަރަށް އުފުލިފައިވީ ނަމަވެސް، ސަރުކާރުން ދަނީ ސަބްސިޑީ ދީގެން އާންމުންނަށް އަތްފޯރާ ފަށެއްގައި ތެޔޮ ފޯރުކޮށްދިނުމަށް މަސައްކަތް ކުރަމުންނެވެ.
"ތެޔޮ ގަވާއިދުން ލިބުމުގައި މިވަގުތު ދަތިތަކެއް ނެތް. އަޅުގަނޑުމެންގެ އަމާޒަކީ އަގު އުފުލަނުދީ ހިފެހެއްޓުން،" މިނިސްޓަރު ވިދާޅުވިއެވެ.
މިދިޔަ ހަފުތާގައި ވެސް ތެލުގެ ދެ ޝިޕްމަންޓެއް ރާއްޖެ ގެނެސްފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވަނީ ވިދާޅުވެފައެވެ. އެސްޓީއޯއިން ހާމަކޮށްފައިވާ ގޮތުގައި އެންމެ ފަހުން ގެނައި ޝިޕްމަންޓުގައި 17 ދުވަހަށް ބޭނުންކުރެވޭ ވަރަށް ޕެޓްރޯލާއި ޑީސަލް ހުއްޓެވެ.
