"ދުންފަތް ކޮންޓްރޯލްކުރުމުގެ އާންމު ޤަވާއިދު" ގެ ދަށުން މިސްކިތްތަކާއި ސްކޫލްތަކުގެ ދޮރާށިތަކުގެ އިމުން ފެށިގެން 25 ފޫޓުގެ ސަރަހައްދުގައި ހިމެނޭ އާންމު ތަންތަނުގައި ދުންފަތުގެ އިސްތިއުމާލުކުރުން މަނާކޮށްފިއެވެ.
މި ގަވާއިދުގެ ދަށުން، މިސްކިތްތަކާއި ސްކޫލްތަކުގެ އިތުރުން ސިއްޙީ ޚިދުމަތްދޭ ތަންތަނާއި، ބޭސްފިހާރަތަކުގެ ކުރިމަތީގައިވެސް ދުންފަތުގެ އިސްތިއުމާލުކުރުން މަނާކުރެވިފައިވެއެވެ. މީގެ އިތުރުން، ދައުލަތުގެ އިދާރާތަކާއި ސަރުކާރު ކުންފުނިތަކުގެ އިމާރާތްތަކާއި ގޯތިތެރޭގައިވެސް ދުންފަތުގެ އިސްތިއުމާލުކުރުން މަނާކުރެވިފައިވާކަމަށް ހެލްތު މިނިސްޓްރީން މަޢުލޫމާތު ދެއްވިއެވެ.
ހެލްތު މިނިސްޓަރ ޑރ. އަހުމަދު ޖަމީލް ވިދާޅުވީ، "މި ގަވާއިދަކީ ރާއްޖޭގައި ދުންފަތުގެ އިސްތިއުމާލުކުރުން މަދުކުރުމަށް އަޅާ މުހިންމު ފިޔަވަޅެއް. ޚާއްޞަކޮށް ކުޑަކުދިންނާއި ޒުވާނުން ދުންފަތުގެ އިސްތިއުމާލުކުރުމުން ދުރުހެލިކުރުމަށް މި ގަވާއިދުން އެހީތެރިވެދޭނެ."
މި ގަވާއިދުގެ ދަށުން، ކުޑަކުދިންގެ ޕާކުތަކާއި، މައިޒާންތަކާއި، ޒުވާނުންގެ މަރުކަޒުތަކާއި، ކުޅިވަރުކުޅޭ ތަންތަނުގައިވެސް ދުންފަތުގެ އިސްތިއުމާލުކުރުން މަނާކުރެވިފައިވެއެވެ. އަދި ގިނަ މީހުން ދިރިއުޅޭ ސަރަހައްދުތަކުގެ އާންމު ގޯޅިތަކުގައިވެސް ދުންފަތުގެ އިސްތިއުމާލުކުރުން މަނާކުރެވިފައިވެއެވެ.
މި ގަވާއިދާ ޚިލާފުވާ ފަރާތްތަކަށް ޖޫރިމަނާ ކުރެވޭނެކަމަށް ހެލްތު މިނިސްޓްރީން ބުނެއެވެ. އެގޮތުން ފުރަތަމަ ފަހަރު 1000 ރުފިޔާ، ދެވަނަ ފަހަރު 2000 ރުފިޔާ، އަދި ތިންވަނަ ފަހަރުން ފެށިގެން ކޮންމެ ފަހަރަކު 3000 ރުފިޔާއިން ޖޫރިމަނާ ކުރެވޭނެއެވެ.
ދުންފަތުގެ އިސްތިއުމާލުކުރުން މަނާ ސަރަހައްދުތަކުގައި އެކަން އަންގައިދޭ ބޯޑުތައް ބެހެއްޓުމަށް ގަވާއިދުގައި ބަޔާންކޮށްފައިވެއެވެ. މި ގަވާއިދަށް ޢަމަލުކުރަން ފަށާފައިވަނީ 12 އޮކްޓޯބަރ 2023 އިން ފެށިގެންނެވެ.
ރިއެކްޓް އަދި ކޮމެންޓް ކުރެއްވުމަށް
