އަމީނީ މަގުގައި މަރާމާތުކުރި ސަރަޙައްދުތައް އާންމު ދަތުރުފަތުރަށް ހުޅުވާލާފައިވާކަމަށް ބިނާރާއި ގެދޮރުވެރިކަމާ ޢުމްރާނީ ތަރައްޤީއާ ބެހޭ ވުޒާރާއިން ވަނީ ވިދާޅުވެފައެވެ.
އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫޢުގެ ދަށުން، ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ސެގްމަންޓް 1 އާއި، އަޑު ކުރިމަތީ އޮންނަ ހަތަރުއަނގޮޅި ކަންމަތި ހިމެނޭ ސެގްމަންޓް 2 ގެ ތާރުއެޅުމުގެ މަސައްކަތް ނިންމައި މިހާރު ވަނީ ހުޅުވާލާފައެވެ.
ދެން އެންމެ އަވަހަށް ފެށުމަށް ހަމަޖެހިފައިވަނީ އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށް އޮންނަ ސެގްމަންޓް 3 ގެ މަސައްކަތެވެ. އާދީއްތަ ދުވަހު މި ސެގްމެންޓުގެ މަސައްކަތް ފެށުމަށް ހަމަޖެހިފައިވާތީ، އެ ސަރަހައްދުގައި ޕާކްކޮށްފައިވާ އުޅަނދުތައް ނެގުމަށާއި ޓްރެފިކް ފްލޯއަށް ބަދަލުތަކެއް އަންނާނެކަން ފުލުހުން ވަނީ އަންގާފައެވެ. މީގެއިތުރުން، ކޯރުކެނޑި ހިނގުމުން ފެށިގެން ޣިޔާސުއްދީން އިންޓަރނޭޝަނަލް ސްކޫލާ ހަމައަށް އޮތް ސެގްމަންޓް 4 ގެ މަސައްކަތްވެސް ކުރިއަށްދާނެއެވެ.
އަމީނީ މަގުގެ މާފަންނާވީ ފަޅީގެ ތާރުގަނޑު ވަރަށް ބޮޑަށް ހަލާކުވެފައިވަނީ އެއީ ބަސްތަކާއި ހެވީ ވެހިކަލްތައް ގިނައިން ދުއްވާ ސަރަހައްދަކަށްވާތީއެވެ. މީގެއިތުރުން، މާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން ބޭރު މަގު (ބޮޑުތަކުރުފާނު މަގު) ގެ ވެސްޓް ޕާކް ސަރަހައްދުގައި ފެން ހިންދާ ނިޒާމުގެ މަސައްކަތް ފެށުމަށް އެ ސަރަހައްދުން ބައެއް ވަނީ ބަންދުކޮށްފައެވެ.
