ރާއްޖޭގެ އެންމެ ބޮޑު މާލީ އިދާރާ، ބޭންކް އޮފް މޯލްޑިވްސް (ބީއެމްއެލް) އިން ރެކޯޑު ފައިދާއެއް ހާސިލްކުރުމާ އެކު، ބޭންކުގެ ހިއްސާގެ ބާޒާރުގެ ހަރަކާތްތެރިކަން އިތުރުކުރުމަށްޓަކައި ހިއްސާގެ އޮނިގަނޑަށް އިންގިލާބީ ބަދަލުތަކެއް ގެންނަން ނިންމައިފި އެވެ.
މިރޭ ބާއްވާ ބޭންކުގެ އަހަރީ އާންމު ޖަލްސާގައި ހުށަހަޅާފައިވާ މި ބަދަލުތަކުގެ ތެރޭގައި "ބޯނަސް ހިއްސާ" ދޫކުރުމާއި، ހިއްސާ ބައިކުރުން ނުވަތަ "ސްޓޮކް ސްޕްލިޓް" އެއް ހިމެނެ އެވެ. މި ފިޔަވަޅުގެ މައިގަނޑު ބޭނުމަކީ ހިއްސާގެ އަގު އަތްފޯރާ ފަށަށް ގެނެސް، އާންމު އިންވެސްޓަރުންގެ ބައިވެރިވުން އިތުރުކުރުމެވެ.
ހިއްސާގެ އާ އޮނިގަނޑު: 1 އިން 30 އަށް
ބޭންކުން ހުށަހަޅާފައިވަނީ މާރިޗު 18، 2026 އާ ހަމައަށް ހިއްސާ އޮތް ފަރާތްތަކަށް ކޮންމެ ހިއްސާއަކަށް ދެ ބޯނަސް ހިއްސާ ދޫކުރުމަށެވެ. މީގެ އިތުރުން "1:10" ރޭޝިއޯ އިން ހިއްސާ ބައިކުރުމަށް ވަނީ ނިންމާފަ އެވެ. މި ބަދަލާ އެކު، މިހާރު 100 ހިއްސާ އޮންނަ މީހެއްގެ ހިއްސާގެ އަދަދު 3,000 އަށް އިތުރުވެގެންދާނެ އެވެ.
ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގެ ސީއީއޯ މުހައްމަދު ހުސައިން މަނިކު ވިދާޅުވީ، މިއީ ހިއްސާގެ ބާޒާރުގައި ލިކުއިޑިޓީ ނުވަތަ ފައިސާ ދައުރުވާ މިންވަރު އިތުރުވާނެ ކަމެއް ކަމަށެވެ.
"ބޭންކުން ހުށަހަޅާ ގޮތަށް ޝެއާ ސްޕްލިޓް ވީމާ ހިއްސާގެ އަގު ދަށްވެފައި އެ ވިއްކަން ފެށީމާ، އަޅުގަނޑުގެ ލަފާކުރުމަކީ މާދުރު ނޫން މުސްތަގްބަލެއްގައި ބޭންކުގެ މާކެޓް ކެޕިޓަލައިޒޭޝަން ތިން ގުނަ ނުވަތަ ހަތަރު ގުނައަށް ދިއުމަކީ އެކަށީގެންވާ ކަމެއް،" މަނިކު ވިދާޅުވި އެވެ.
އިގްތިސާދީ އަސަރު
މޯލްޑިވްސް ސްޓޮކް އެކްސްޗޭންޖުގެ މެނޭޖިން ޑިރެކްޓަރު މުހައްމަދު އައުޝަން ލަތީފް ފާހަގަކުރެއްވި ގޮތުގައި، ހިއްސާގެ މޫނުމަތީ އަގު ތިރިވުމުން ކުދި އިންވެސްޓަރުންނަށް ބާޒާރަށް ވަނުމަށް އޮންނަ ހުރަސްތައް ނެތިގެންދާނެ އެވެ. މީގެ ސަބަބުން އާދައިގެ މުވައްޒަފުންނާއި ކުދި ވިޔަފާރިވެރިންނަށް ގައުމީ ބޭންކުގެ މިލްކުވެރިކަމުގައި ބައިވެރިވުމުގެ ފުރުސަތު ފަހިވާނެ އެވެ.
އިގްތިސާދީ މާހިރުން ދެކޭ ގޮތުގައި މި ސްޓްރެޓީޖިކް ބަދަލަކީ ބީއެމްއެލްގެ ހަގީގީ މާކެޓް އަގު ހާމަވެ، ބޭންކުގެ އިންވެސްޓަރުންގެ އަސާސް އިތުރަށް ވަރުގަދަވެގެންދާނެ ކަމެކެވެ. މިއީ ހަމައެކަނި ހިއްސާދާރުންނަށް އޮތް ފައިދާއެއް ނޫން ކަމަށާއި، މިއީ މުޅި ރާއްޖޭގެ ކެޕިޓަލް މާކެޓް ތަރައްގީކުރުމަށް އެޅޭ މުހިންމު ފިޔަވަޅެއް ކަމަށް ބޭންކުން ބުނެ އެވެ.
