އިންޑޮނޭޝިއާގެ އިރުމަތީ ސަރަހައްދަށް މިއަދު އައި ބާރުގަދަ ބިންހެލުމާ ގުޅިގެން ދިވެހިރާއްޖެއަށް އެއްވެސް ނުރައްކަލެއް ނެތް ކަމަށާއި، އޭގެ އެއްވެސް އަސަރެއް ރާއްޖެއަށް ނުކުރާނެ ކަމަށް މޫސުމާ ބެހޭ ޤައުމީ އިދާރާއިން ހާމަކޮށްފިއެވެ.
އެ އިދާރާއިން ބުނި ގޮތުގައި މި ބިންހެލުމުގެ ސަބަބުން ރާއްޖެއަށް ސުނާމީގެ އެއްވެސް ބިރުވެރިކަމެއް ނެތެވެ. މި ބިންހެލުން އައިސްފައިވަނީ ރިކްޓަރ މިންގަނޑުން 7.7 ގެ ބާރުމިނުގައެވެ.
ބިންހެލުމުގެ ސަބަބުން އިންޑޮނޭޝިއާގެ ބައެއް ސަރަހައްދުތަކަށް ސުނާމީގެ އިންޒާރު ނެރުނު ނަމަވެސް، ރާއްޖެއާ އެ ސަރަހައްދާ ހުރި ދުރުމިނުގެ ސަބަބުން ރާއްޖޭގެ ކަނޑުގެ ސަރަހައްދަށް އެއްވެސް ބަދަލެއް އަންނާނެ ކަމަށް ނުބެލެވެއެވެ. އިންޑޮނޭޝިއާއަކީ އާންމުކޮށް ބިންހެލުންތައް އަންނަ ސަރަހައްދަކަށް ވާއިރު، މިފަދަ ބިންހެލުންތަކާ ގުޅިގެން ރާއްޖޭގެ މޫސުމާ ބެހޭ އިދާރާއިން އަބަދުވެސް ދަނީ ހާލަތު ބަލައި މޮނިޓަރ ކުރަމުންނެވެ. އެހެންކަމުން މި ހާދިސާއާ ގުޅިގެން އާންމުން ކަންބޮޑުވާންޖެހޭ ފަދަ އެއްވެސް ސަބަބެއް ނެތް ކަމަށް އެ އިދާރާއިން ކަށަވަރުކޮށްދެއެވެ.
