ފީފާގެ ރައީސް އިންފަންޓީނޯގެ މަގާމާ މެދު ގޮތް ނިންމަންވާނީ އިންތިޚާބަކުން: އެފްރިކާގެ ފުޓްބޯޅަ އިދާރާގެ ރައީސް

ދުނިޔޭގެ ފުޓްބޯޅައިގެ މައި އިދާރާ ކަމަށްވާ ފީފާގެ ރައީސް ޖިއާނީ އިންފަންޓީނޯގެ މުސްތަގުބަލާ މެދު ގޮތް ނިންމަންވާނީ އިންތިޚާބަކުން ކަމަށް އެފްރިކާގެ ފުޓްބޯޅަ ކޮންފެޑަރޭޝަން (ކާފް) ގެ ރައީސް ޕެޓްރިސް މޮޓްސެޕޭ ވިދާޅުވެއްޖެއެވެ.

އޭނާ މިހެން ވިދާޅުވީ ވޯލްޑް ކަޕްގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް އިންފަންޓީނޯ ކުރެއްވި މަސައްކަތާ ގުޅިގެން ގިނަ ގައުމުތަކެއްގެ ފުޓްބޯޅަ އެސޯސިއޭޝަންތަކުން އޭނާއަށް އޮތް ތާއީދު އަނބުރާ ގެންދަމުންދާ ދަނޑިވަޅެއްގައެވެ. މި މައްސަލައިގައި ވާހަކަދައްކަވަމުން ކާފްގެ ރައީސް ފާހަގަކުރެއްވީ ފީފާގެ ރައީސްގެ މަގާމާ މެދު ގޮތް ނިންމުމުގެ ފުރިހަމަ ބާރު އޮންނަންވާނީ އެ އިދާރާގެ މެންބަރު 211 އެސޯސިއޭޝަނަށް ކަމަށެވެ. އަދި ވަކިވަކި ގައުމުތަކުން ނުވަތަ ކޮންފެޑަރޭޝަންތަކުން ޕްރެޝަރުކޮށްގެން އޭނާ މަގާމުން ދުރުކުރުމުގެ ބަދަލުގައި، އަންނަ އަހަރު ބޭއްވުމަށް ހަމަޖެހިފައިވާ އިންތިޚާބުގައި ވޯޓަކުން އެކަން ނިންމުމަކީ އެންމެ ރަނގަޅު ގޮތް ކަމަށް ވެސް އޭނާ ވިދާޅުވިއެވެ.

ފީފާގެ ރައީސްގެ މަގާމުން އިންފަންޓީނޯ އިސްތިއުފާ ދެއްވުމަށް ޔޫރަޕްގެ ފުޓްބޯޅަ އިދާރާ (ޔޫއީއެފްއޭ) އާއި އޭޝިއާގެ ފުޓްބޯޅަ އިދާރާ (އޭއެފްސީ) ގެ އިތުރުން ކޮންކާކަފް އިން ދަނީ ބާރުއަޅަމުންނެވެ. އެ އިދާރާތަކުން ތުހުމަތުކުރާ ގޮތުގައި އިންފަންޓީނޯ ވަނީ އަމިއްލަ ފައިދާއަށްޓަކައި މުޅި ފުޓްބޯޅަ އާއިލާގެ އިތުބާރު ގެއްލުވާލާފައެވެ. ނަމަވެސް އެފްރިކާގެ ފުޓްބޯޅަ އިދާރާއިން ވަނީ އިންފަންޓީނޯއަށް އޮތް ތާއީދު ދަމަހައްޓާނެކަން ހާމަކޮށްފައެވެ. މި ނުތަނަވަސްކަމުގެ ތެރޭގައި، އަޔަލޭންޑްގެ ފުޓްބޯޅަ އެސޯސިއޭޝަނުން ވެސް ވަނީ އިންފަންޓީނޯއަށް ކުރާ ތާއީދު ރަސްމީކޮށް އަނބުރާ ގެންގޮސްފައެވެ. ފީފާގެ ރިޔާސީ އިންތިޚާބު ބޭއްވުމަށް ހަމަޖެހިފައިވަނީ ކުރިޔަށް އޮތް އަހަރުގެ މާރިޗު މަހުގެ ތެރޭގައި މޮރޮކޯގެ ރަބާތުގައެވެ.