ވިލިމާލޭގެ ރައްޔިތުންނާއި މާލެ ސަރަހައްދުގައި ދަތުރުފަތުރުކުރާ ކަނޑު އުޅަނދުފަހަރަށް ފަސޭހަކަމާއެކު ތެޔޮ ލިބޭނެ އިންތިޒާމު ހަމަޖެއްސުމަށްޓަކައި، ފިއުލް ސަޕްލައި މޯލްޑިވްސް (އެފް.އެސް.އެމް) އިން އެ ރަށުގައި ތަރައްގީކުރާ އައު ފިއުލް ސްޓޭޝަނުގެ މަސައްކަތުގެ 25 އިންސައްތަ ނިމިފައިވާ ކަމަށް އެކުންފުނިން ބުނެފިއެވެ.
މިދިޔަ މަހުގެ 6 ވަނަ ދުވަހު އަމަލީ މަސައްކަތް ފެށި މި މަޝްރޫއުގެ މައިގަނޑު ބޭނުމަކީ، ވިލިމާލޭގެ އުޅަނދުތަކަށް ތެޔޮ ހޯދުމުގައި ދިމާވާ ދަތިތަކަށް ދާއިމީ ހައްލެއް ހޯދައިދިނުމެވެ. އެފްއެސްއެމްއިން ބުނީ މި ސްޓޭޝަން ހުޅުވުމާއެކު، ތެޔޮ އެޅުމަށްޓަކައި މާލެއަށް ނުވަތަ އެހެން ސަރަހައްދުތަކަށް ކުރަންޖެހޭ ދަތުރުތައް ހުއްޓުމަކަށް އައިސް، ވަގުތާއި ހަރަދު ވަރަށް ބޮޑަށް ސަލާމަތްވެގެންދާނެކަމަށެވެ.
ޒަމާނީ ފެންވަރަށް ތަރައްގީކުރާ މި ފިއުލް ސްޓޭޝަނުން ޕެޓްރޯލާއި ޑީސަލްގެ ޚިދުމަތް ލިބެން ހުންނާނެއެވެ. ކަނޑު އުޅަނދުފަހަރަށް އެންމެ ފަސޭހައިން ކައިރިކުރެވޭނެ ފަދަ ގޮތަކަށް ޖެޓީ ސަރަހައްދުގައި ގާއިމުކުރާ މި ސްޓޭޝަނުން، ތެލުގެ އިތުރުން އުޅަނދުފަހަރަށް ބޭނުންވާ ފެނުގެ ޚިދުމަތް ވެސް ލިބޭނެ އިންތިޒާމު ދަނީ ހަމަޖައްސަމުންނެވެ.
އެފްއެސްއެމްގެ އަމާޒަކީ ކުރިއަށް އޮތް 55 ދުވަހުގެ ތެރޭގައި މި މަޝްރޫއުގެ ހުރިހާ މަސައްކަތެއް ނިންމައި، ރަސްމީކޮށް ޚިދުމަތް ދޭން ފެށުމެވެ.
އެ ކުންފުނިން ގަބޫލުކުރާ ގޮތުގައި މި ސްޓޭޝަނުގެ ޚިދުމަތް ފެށުމުން، ވިލިމާލޭގެ އިގްތިސާދީ އަދި އިޖުތިމާއީ ހަރަކާތްތަކަށް ވަރަށް ބޮޑު ކުރިއެރުމަކާއި ލުއިފަސޭހަކަމެއް ލިބިގެންދާނެއެވެ.
