ނޭޝަނަލް ސޯޝަލ ޕްރޮޓެކްޝަން エޖެންސީ (އެންސްޕާ) ގެ ކޯލް ސެންޓަރު، އެ އިދާރާގެ އައްޑޫ އޮފީހުގައި ޤާއިމްކޮށް ރަސްމީކޮށް ޚިދުމަތް ދޭން ފަށައިފިއެވެ. ސިއްޙީ ވުޒާރާއިން ހާމަކުރެއްވި ގޮތުގައި، މި ބަދަލާއެކު ރައްޔިތުންނަށް އެންސްޕާގެ ޚިދުމަތްތައް ހޯދުމުގައާއި އެހީތަކުގެ އެންމެ ފަހުގެ އަދާހަމަ މަޢުލޫމާތު ހޯދުމުގައި ބޮޑެތި ފަސޭހަތަކެއް ލިބިގެންދާނެއެވެ.
މީގެ ކުރިން ހަމައެކަނި ރަސްމީ ދުވަސްތަކުގެ ރަސްމީ ގަޑިތަކުގައި ޚިދުމަތް ދެމުން އައިނަމަވެސް، މިއަދުން ފެށިގެން އެންސްޕާގެ ކޯލް ސެންޓަރުގެ ޚިދުމަތްތައް ވަނީ ވަރަށް ބޮޑަށް ފުޅާކޮށްފައެވެ. އެގޮތުން ހުކުރު ދުވަސް ފިޔަވައި ހަފުތާގެ ކޮންމެ ދުވަހަކުވެސް މި ޚިދުމަތް ރައްޔިތުންނަށް ލިބޭނެއެވެ. ޚިދުމަތްދޭ ގަޑިއަކީ ހެނދުނު 8:00 އިން ފެށިގެން ރޭގަނޑު 10:00 އާ ހަމައަށެވެ.
އެންސްޕާއިން ދޭ މާލީ އެހީތެރިކަމާއި އިނާޔަތްތަކާ ގުޅޭ މަޢުލޫމާތު ސާފުކުރުމަށް ބޭނުންކުރާ ހޮޓްލައިން ނަންބަރު 1402 މެދުވެރިކޮށް ގިނަ ޚިދުމަތްތަކެއް ފޯރުކޮށްދެއެވެ.
މި ހޮޓްލައިންގެ ޒަރީއާއިން މެޑިކަލް ވެލްފެއަރ ނުވަތަ ބޭސްފަރުވާގެ އެހީއާ ގުޅޭ ހުރިހާ މަޢުލޫމާތެއް ސާފުކުރެވޭނެއެވެ. އަދި ނުކުޅެދުންތެރިކަން ހުންނަ މީހުންނަށް ދެވޭ މާލީ އެހީއާއި އިނާޔަތްތަކުގެ ތަފްސީލް ހޯދުމުގެ އިތުރުން، އެކި ޕްރޮގްރާމްތަކަށް ފޯމު ފުރުމުގައި ދިމާވާ ދަތިތަކަށް އިރުޝާދު ދިނުމުގެ ޚިދުމަތްވެސް ލިބޭނެއެވެ. މީގެ އިތުރުން އެންސްޕާގެ ޚިދުމަތްތަކާ ގުޅުންހުރި އެހެނިހެން އާންމު މަޢުލޫމާތުތައްވެސް މި ނަންބަރުން އޮޅުންފިލުވައިދޭނެއެވެ.
ކޯލް ސެންޓަރުގެ އިތުރުން، އެންސްޕާގެ ޚިދުމަތްތަކަށް މިހާރު ވަންގަވް ޕޯޓަލް މެދުވެރިކޮށް އޮންލައިންކޮށް ފޯމު ހުށަހެޅޭނެ އިންތިޒާމް ވަނީ ހަމަޖައްސާފައެވެ.ފަގީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިންނާއި ބަފައިންނަށް ދޭ މާލީ އެހީ، ކާބޯތަކެތި ގަތުމަށް ދޭ މާލީ އެހީ، ނުކުޅެދުންތެރިކަން ހުންނަ ފަރާތްތަކުގެ ޚިދުމަތްތަކާއި ތެރަޕިއުޓިކް ފަރުވާގެ އެހީ، ތެލެސީމިއާ އެލަވަންސް، އަދި މައިންބަފައިންގެ އެހީތެރިކަމެއް ނެތި އެހެން މީހަކު ބަލަހައްޓާ ކުދިންނާއި އެ ކުދިން ބަލަހައްޓާ ފަރާތްތަކަށް ދޭ މާލީ އެހީގެ ޕްރޮގްރާމްތައް މީގެ ތެރޭގައި ހިމެނެއެވެ.
