ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ސިޔާސަތުތަކަށް ގެންނަން ނިންމާފައިވާ އިސްލާހީ ބަދަލުތަކަށް މަސައްކަތް ކުރުމަށްޓަކައި "ބޮޑު ބަދަލު" އޮފީސް އެ ޕާޓީގެ ގައުމީ ސެކްރެޓޭރިއަޓުގައި މިއަދު ރަސްމީކޮށް ގާއިމުކޮށްފިއެވެ.
މި އޮފީހަކީ 2026 ވަނަ އަހަރު ބޭއްވުނު އެމްޑީޕީގެ 4 ވަނަ ދައުރުގެ 35 ވަނަ ގައުމީ މަޖިލީހުގެ ޖަލްސާގައި، ރިޔާސަތުން ހުށަހަޅުއްވައި މެންބަރުންގެ އަޣުލަބިއްޔަތުން ފާސްކުރި ނިންމުމަކަށް އަމަލުކުރުމުގެ ގޮތުން ހުޅުވި އޮފީހެކެވެ. މި އޮފީހުގެ އެންމެ އިސްވެރިއެއްގެ ގޮތުން "ޑައިރެކްޓަރ ޖެނެރަލް" ގެ މަގާމަށް އައްޔަންކުރައްވާފައިވަނީ ޕާޓީގެ ކުރީގެ ޗެއާޕާސަން ޙަސަން ލަޠީފެވެ.
"ބޮޑު ބަދަލު" އަކީ އެމްޑީޕީގެ މިހާރުގެ ލީޑަޝިޕްގައި ހިމެނިވަޑައިގަންނަވާ މުހިންމު ބޭފުޅުން ކަމަށްވާ މުޙައްމަދު ނަޝީދާއި ފައްޔާޒް އިސްމާއީލް އިސްވެ ތިއްބަވައިގެން އެކުލަވާލާފައިވާ ޚާއްޞަ މެނިފެސްޓޯއެކެވެ. މި މެނިފެސްޓޯގެ މައިގަނޑު އަމާޒަކީ ދައުލަތް ހިންގުމުގެ ނިޒާމަށާއި ގައުމުގެ އިގްތިސާދީ އަދި އިޖުތިމާއީ އޮނިގަނޑަށް އިންގިލާބީ ބަދަލުތަކެއް ގެނައުމެވެ.
މި އިސްލާހީ އެޖެންޑާގެ ދަށުން ހުށަހަޅާފައިވާ އެންމެ މުހިންމު އެއް ކަމަކީ ގައުމުގެ ވެރިކަމުގެ ނިޒާމަށް ބަދަލުތަކެއް ގެނައުމެވެ. އޭގެ ތެރޭގައި ދައުލަތާއި ސަރުކާރު ވަކިކުރުމާއި، ގާނޫނުއަސާސީއަށް ޒަމާނީ ބަދަލުތަކެއް ގެނައުން ހިމެނެއެވެ. އެމްޑީޕީގެ އެތެރޭގެ އިންތިޚާބުތަކުގައިވެސް "ބޮޑު ބަދަލު" މި ސްލޯގަން ވަނީ ވަރަށް ބޮޑަށް ބޭނުންކޮށްފައެވެ.
އަލަށް އުފެއްދި މި އޮފީހުގެ މައިގަނޑު މަސްއޫލިއްޔަތަކީ މި މެނިފެސްޓޯގައި ހިމެނޭ ކަންކަން ތަންފީޒުކުރުމަށް ބޭނުންވާ ފަންނީ މަސައްކަތްތައް ކުރުމާއި، ޕާޓީގެ މެންބަރުންނަށާއި އާންމުންނަށް މި ސިޔާސަތުތައް ތައާރަފުކޮށްދިނުމެވެ. މިއީ ކުރިއަށް އޮތް ރިޔާސީ އިންތިޚާބަށް އެމްޑީޕީން ވާ ތައްޔާރީތަކުގެ މުހިންމު ފިޔަވަޅެއްގެ ގޮތުގައި ބެލެވެއެވެ.
