ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީ.ސީ.ބީ) ގެ ރައީސްކަމުގެ މަގާމަށް އައްޔަންކުރައްވާފައިވާ އަލްފާޟިލް މުޙައްމަދު ނިޒާރަށް ރުހުން ހޯދުމުގެ މައްސަލަ ރައްޔިތުންގެ މަޖިލީހަށް ހުށަހަޅައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ނިޒާރަށް ރުހުން ދިނުމާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ސިޓީފުޅު ވަނީ އިއްވާފައެވެ. މަޖިލީހުގެ ރިޔާސަތުން މި މައްސަލަ އިތުރަށް ދިރާސާކުރުމަށްޓަކައި ސަރުކާރު ހިއްސާވާ ކުންފުނިތަކާ ބެހޭ ކޮމިޓީ (އެސް.އޯ.އީ ކޮމިޓީ) އަށް މިހާރު ވަނީ ފޮނުވާފައެވެ.
ޕީ.ސީ.ބީގެ ރައީސްކަމުގެ މަގާމަށް ނިޒާރު އައްޔަންކުރައްވާފައިވަނީ، އެ މަގާމުގައި ކުރިން ހުންނެވި މުޙައްމަދު އަނަސް އިސްތިއުފާ ދެއްވުމާ ގުޅިގެންނެވެ. މުޙައްމަދު ނިޒާރަކީ މި ދާއިރާގައި ތަޖުރިބާކާރު ބޭފުޅެކެވެ. އެގޮތުން، 2014 ވަނަ އަހަރާއި 2019 ވަނަ އަހަރާ ދެމެދު ވެސް އޭނާ ވަނީ ޕީ.ސީ.ބީގެ ރައީސްކަމުގެ މަގާމު ފުރުއްވާފައެވެ.
ޕީ.ސީ.ބީ އަކީ ދައުލަތުގެ ވިޔަފާރި ތަންތަން ޕްރައިވަޓައިޒް ކުރުމާއި، ކޯޕަރަޓައިޒް ކުރުމާއި އަދި ސަރުކާރު ހިއްސާވާ ކުންފުނިތައް މޮނިޓަރކޮށް އިވެލުއޭޓް ކުރުމުގެ ޒިންމާ މަތިކޮށްފައިވާ މުހިންމު އިދާރާއެކެވެ. ކޮމިޓީން ނިޒާރުގެ ނަން ދިރާސާކުރުމަށްފަހު، މަޖިލީހުގެ ތަޅުމުން އޭނާއަށް ރުހުން ދިނުމާ މެދު ގޮތެއް ނިންމާނެއެވެ.
