ރާއްޖޭގެ އިދާރީ އޮނިގަނޑަށް ގެނައި ބަދަލުތަކާއެކު، އަތޮޅު ކައުންސިލްތަކުގައި މަސައްކަތް ކުރައްވަމުން ގެންދެވި ހުރިހާ ސެކްރެޓަރީ ޖެނެރަލުން (އެސްޖީން) އިއްޔެ މަގާމުން ވަކިކޮށްފިއެވެ.
މި ބަދަލު ގެނެސްފައިވަނީ ގާނޫނުއަސާސީއަށް ގެނައި އިސްލާހެއްގެ ދަށުން އަތޮޅު ކައުންސިލްތައް އުވާލުމާ ގުޅިގެންނެވެ. ސަރުކާރުގެ އޮފިޝަލަކު ވިދާޅުވި ގޮތުގައި، އެސްޖީން މަގާމުން ވަކިކުރީ ކައުންސިލްތަކުގެ އޮނިގަނޑު އުވިގެން ދިއުމާ ގުޅިގެން "ރިޑަންޑެންސީ" އުސޫލުންނެވެ. އެހެންކަމުން، ގަވާއިދާ އެއްގޮތަށް ނޯޓިސް މުއްދަތުގެ ފައިސާ އާއި ރިޑަންޑެންސީ އިނާޔަތް އެ ފަރާތްތަކަށް ލިބިގެންދާނެއެވެ.
އަތޮޅު ކައުންސިލްތައް އުވާލުމަށް ގާނޫނުއަސާސީއަށް އިސްލާހު ހުށަހެޅުއްވީ ސަރުކާރު ހިންގާ ޕީއެންސީގެ ބާރަށު ދާއިރާގެ މެންބަރު އިބްރާހިމް ޝުޖާއުއެވެ.
މި އިސްލާހުގައިވަނީ އަތޮޅު ކައުންސިލްތަކުގެ މިދިޔަ ދައުރު ހަމަވުމާއެކު އެ ކައުންސިލްތައް އުވިގެންދާނެ ކަމަށެވެ. މިދިޔަ މަހުގެ 17 ވަނަ ދުވަހު އާ ކައުންސިލަރުން ހުވާކުރެއްވުމާއެކު، ކުރިން ހުރި އަތޮޅު ކައުންސިލްތައް އުވި، އެ އިދާރާތައް މިހާރު ވަނީ ލޯކަލް ގަވަރމަންޓް އޮތޯރިޓީ (އެލްޖީއޭ) ގެ އަތޮޅު އޮފީސްތަކަށް ބަދަލުކޮށްފައެވެ.
ކައުންސިލްތަކުގެ އިދާރީ ހިންގުމުގެ އެންމެ އިސްވެރިންނަކީ ސެކްރެޓަރީ ޖެނެރަލުން ކަމަށްވާއިރު، މި ބަދަލާއެކު އެ ފަރާތްތަކުގެ ވަޒީފާ ވަނީ ގެއްލިފައެވެ. ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މީގެ ކުރިން ވިދާޅުވެފައިވަނީ، އިދާރީ އޮނިގަނޑަށް ގެންނަ ބަދަލަކާ ގުޅިގެން އެއްވެސް މުވައްޒަފެއްގެ ވަޒީފާ ނުގެއްލޭނެ ގޮތަށާއި، އެ މީހުންނަށް ލިބޭ މުސާރައާއި އިނާޔަތްތަކަށް އުނިކަމެއް ނާންނާނެ ގޮތަށް ކަންކަން ހަމަޖެއްސުމަށް ކަމާބެހޭ އިދާރާތަކަށް އަންގާފައިވާނެ ކަމަށެވެ.
އެހެންކަމުން، މަގާމުން ވަކިކުރި އެސްޖީންނަށް އެހެން ވަޒީފާތަކެއް ހަމަޖައްސައިދިނުމުގެ މަސައްކަތް ސަރުކާރުން ކުރަމުންދާނެ ކަމަށް ބެލެވެއެވެ. މި ބަދަލަކީ ލާމަރުކަޒީ ނިޒާމު އިތުރަށް ހަރުދަނާކޮށް، އިދާރީ ހިންގުން އެއްފުރާޅެއްގެ ދަށަށް ގެނައުމަށް ސަރުކާރުން ކުރަމުންދާ މަސައްކަތުގެ ބައެކެވެ.
