މިއަދު ފާހަގަކުރަމުންދާ "ދުނިޔޭގެ ދުންފަތުގެ އިސްތިއުމާލު ނުކުރާ ދުވަހާ" ގުޅިގެން ރައީސް ޑރ. މުޙައްމަދު މުޢިއްޒު ދެއްވި މެސެޖުގައި، ދުންފަތުގެ ނުރައްކަލުން ދިވެހި މުޖުތަމަޢު ސަލާމަތްކުރުމަށް ސަރުކާރުން ގެންގުޅުއްވާ ހަރުދަނާ ޢަޒުމް އައުކުރެއްވިއެވެ.
މިގޮތުން، އީ-ސިނގިރޭޓު މަނާކުރުމާއި، ދުންފަތާ ދެކޮޅަށް "ޖެނެރަލް ބޭން" އެއް ތަންފީޒުކުރަން ފެށި ދުނިޔޭގެ ފުރަތަމަ ޤައުމުގެ ޝަރަފު ރާއްޖެއަށް ހޯދައިދިނުމަށް ސަރުކާރުން އަޅުއްވަމުންދާ ހަރުދަނާ ފިޔަވަޅުތައް އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ތަފާތު ރަހަތަކާއެކު ބާޒާރަށް ނެރޭ ނިކޮޓިން ޕައުޗްތަކާއި، އާޓިފިޝަލް އިންޓެލިޖެންސް ބޭނުންކޮށްގެން ޒުވާނުންނަށް އަމާޒުކޮށް ކުރާ ދުންފަތުގެ އިސްތިހާރުތަކާމެދު ސަރުކާރުން ނުހަނު ސަމާލުވެ ހުޝިޔާރުވެ އޮންނާނެކަމުގެ ޔަގީންކަން ދެއްވިއެވެ.
އަދި ޒުވާން ޖީލު މި ނުރައްކާތެރި ވަބާއިން ރައްކާތެރިކުރުމުގައި ސަރުކާރު ދެމިއޮންނާނެ ކަމަށާއި، ދުންފަތުން ދުރުހެލިވުމަށް އެހީތެރިވެދޭ 'ސިސޭޝަން ކްލިނިކް' ތައް އިތުރުކުރުމާއި، ދުންފަތުގެ އިސްތިއުމާލުކުރުން މަނާ ސަރަޙައްދުތައް ކަނޑައެޅުމުގެ އިތުރުން، ކަމާގުޅޭ ޤާނޫނާއި ގަވާއިދުތައް އިޞްލާޙުކުރުމުގެ މަސައްކަތް ބާރުގަބޫލުގައި ކުރިއަށްދާނެކަމަށް ވިދާޅުވިއެވެ.
ދުންފަތުގެ ވަބާއިން ދިވެހި މުޖުތަމަޢު ސަލާމަތްކުރުމަށް ސަރުކާރުން އަޅުއްވާފައިވާ މުހިންމު ފިޔަވަޅުތަކުގެ ތެރޭގައި، ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުމާއި، ދުންފަތުގެ ވިޔަފާރިކުރެވޭނެ އެންމެ ހަގު އުމުރަކީ 21 އަހަރު ކަމުގައި ބަދަލުކުރުން ހިމެނެއެވެ.
ރައީސް ވަނީ ދުންފަތުން ރައްކާތެރިވެފައިވާ، ދުޅަހެޔޮ މުޖުތަމަޢެއް ބިނާކުރުމަށް ހުރިހާ ރައްޔިތުން އެކުގައި އަތްގުޅާލުމަށް އިލްތިމާސްކުރައްވާފައެވެ.
