އެމްޑީޕީގެ މައްޗަށް ދަޢުވާކޮށް ސިވިލް ކޯޓަށް މިއަދު ހުށަހެޅި މައްސަލައަކީ ރައީސް މުޙައްމަދު ނަޝީދުގެ ކެމްޕޭން ޓީމުގެ ފަރާތުން ހުށަހެޅި މައްސަލައެއް ކަމަށް ބުނެ ދެކެވޭ ވާހަކަތައް، އެމަނިކުފާނުގެ ކެމްޕޭން ތަރުޖަމާނު ޢަބްދުﷲ ވަހީދު ދޮގުކުރައްވައިފިއެވެ.
އެމްޑީޕީގެ ޗެއާޕާސަން އިންތިޚާބާ ގުޅޭގޮތުން އެ ޕާޓީން ކަނޑައެޅި ތާވަލު ބާޠިލުކުރުމަށް އެދި ސިވިލް ކޯޓަށް މައްސަލަ ހުށަހެޅުއްވީ ޤާނޫނީ ވަކީލު ޢަބްދުﷲ ޝާއިރެވެ. އޭނާ ފާހަގަކުރެއްވި ގޮތުގައި އެ ތާވަލަކީ ޕާޓީގެ އަސާސީ ޤަވާއިދާ ޚިލާފު އެއްޗެކެވެ.
މި މައްސަލައިގެ ފަހަތުގައި ވަނީ ރައީސް ނަޝީދުގެ ޓީމު ކަމަށް ވާދަވެރިން ތުހުމަތުކުރަމުން ދަނިކޮށް، ތަރުޖަމާނު ވަހީދު ވިދާޅުވީ އެއީ އެއްވެސް ޙަޤީޤަތެއް ނެތް ދޮގު ވާހަކަތަކެއް ކަމަށެވެ. އަދި މިފަދަ ދޮގު މަޢުލޫމާތު ފެތުރުން އޭނާ ވަނީ ވަރަށް ބޮޑަށް ކުށްވެރިކުރައްވާފައެވެ.
ވަހީދު އިތުރަށް ވިދާޅުވި ގޮތުގައި، މިފަދަ ދޮގު ވާހަކަތަކުގެ ސަބަބުން ޕާޓީގެ އެތެރޭގެ އިންތިޚާބުތަކަށް އޮންނަ އިތުބާރު ގެއްލި، މަޞްލަޙަތު ނަގާލުމަށް ފުރުޞަތު ލިބިގެންދާނެއެވެ.
ރައީސް ނަޝީދުގެ ކެމްޕޭން ޓީމުގެ އެދުމަކީ ވީހާވެސް އަވަހަށް ޕާޓީގެ ޢާންމު މެންބަރުންނަށް ވޯޓުލުމުގެ ފުރުޞަތު ފަހިވެގެންދިއުން ކަމަށްވެސް އޭނާ ފާހަގަކުރެއްވިއެވެ.
މީގެއިތުރުން، ރައީސް ނަޝީދުގެ ކެމްޕޭނާ ގުޅޭ ހުރިހާ ނިންމުންތަކާއި ހިންގާ ޙަރަކާތްތަކުގެ މަޢުލޫމާތު ރަސްމީ އުޞޫލުން ޤަވާއިދުން ހާމަކުރަމުންދާނެ ކަމުގެ ޔަޤީންކަންވެސް ވަހީދު ދެއްވިއެވެ.
