އަންނަ މަހު ބޭއްވުމަށް ތާވަލުކޮށްފައިވާ އެމްޑީޕީގެ ޗެއާޕާސަން ހޮވުމުގެ އިންތިހާބާ ގުޅޭ އިއުލާނު ބާތިލްކުރުމަށް އެދި ސިވިލް ކޯޓަށް މައްސަލައެއް ހުށަހަޅައިފިއެވެ. މި މައްސަލަ ކޯޓަށް ހުށަހެޅުއްވީ ގާނޫނީ ވަކީލު އަބްދުﷲ ޝާއިރެވެ.
ކޯޓަށް ހުށަހެޅި ދައުވާގައި ބުނެފައިވަނީ، އިންތިހާބަށް ކޮށްފައިވާ އިއުލާނަކީ ކުރީގެ ރައީސް މުހައްމަދު ނަޝީދުގެ ކެމްޕޭން ހަރަކާތްތަކަށް ހުރަސްއެޅޭ ގޮތަށް ނެރެފައިވާ އިއުލާނެއް ކަމަށެވެ. އަދި އެމްޑީޕީގެ އިންތިހާބީ ކޮމިޓީގެ ނިންމުންތަކަކީ ޕާޓީގެ އަސާސީ ގަވާއިދާއި، ގާނޫނުއަސާސީގެ އިތުރުން ބައިނަލްއަގުވާމީ އިންސާފުގެ ހަމަތަކާ ޚިލާފު، ގާނޫނީ ހައިސިއްޔަތެއް ނެތް ނިންމުންތަކެއް ކަމަށްވެސް ދައުވާގައި ފާހަގަކޮށްފައިވެއެވެ.
ދައުވާގައި ފާހަގަކޮށްފައިވާ މުހިންމު ކަންތައްތައް:
-
މެންބަރުންގެ ހައްގު: ވޯޓުލުމުގެ ހައްގު ލިބިގެންވާ މެންބަރުން ކަނޑައެޅުމުގައި ކުއްލި ސުންގަޑިއެއް ކަނޑައެޅުމަކީ އާންމު މެންބަރުންގެ ގާނޫނީ ހައްގުތަކަށް އުނިކަން އަންނަ ކަމެއް ކަމަށް ބުނުން.
-
އިޖުރާއީ މައްސަލަ: މީގެ ކުރިން (2017 އާއި 2021 ގައި) ބޭއްވި އިންތިހާބުތަކުގައި ކަންކަން ހިންގުމުގެ ބާރު އޮތީ އިސްތިއުނާފް ފަނޑިޔާރުންގެ މަޖިލީހުގެ ރައީސަށް ކަމަށްވާއިރު، މިފަހަރު އެ އުސޫލުން އަމަލުނުކުރުން.
-
އެދިފައިވާ ގޮތް: މިހާރު ކޮށްފައިވާ އިއުލާނު ބާތިލްކޮށް، އިންތިހާބުގެ ހުރިހާ ކަމެއް ހިންގުމުގެ މަސްއޫލިއްޔަތު ޕާޓީގެ އިސްތިއުނާފް ފަނޑިޔާރުންގެ މަޖިލީހާ ހަވާލުކޮށްދިނުން.
މި އިންތިހާބަކީ ރައީސް ނަޝީދުގެ އިތުރުން، މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމާއި، އިބްރާހިމް މުހައްމަދު (ވާޑު) ވާދަކުރައްވާ ވަރަށް ފޯރިގަދަ އިންތިހާބެކެވެ. ޚާއްސަކޮށް ނަޝީދާއި މީކާއިލްގެ ކެމްޕޭން ޓީމުތަކުގެ މެދުގައި ބަހުގެ ހަމަލާތައް ބަދަލުކުރެވި، ޕާޓީގެ އެތެރޭގެ މަސްރަހު ވަނީ ވަރަށް ބޮޑަށް ހޫނުވެފައެވެ.
އަންނަ މަހުގެ 12 ވަނަ ދުވަހު ބޭއްވުމަށް ހަމަޖެހިފައިވާ މި އިންތިހާބުގެ މައްސަލަ ކޯޓަށް ހުށަހެޅިއިރު، މީގެ ކުރިން މި މައްސަލަ ޝާއިރުގެ ފަރާތުން އެމްޑީޕީގެ އެތެރޭގެ ގުނަވަންތަކަށްވެސް ހުށަހަޅާފައިވާކަން ފާހަގަކުރެވެއެވެ.
