"އަދަދު" ނޫހުގެ އޮފީސް ފާސްކޮށް، އެ ނޫހުގެ އިސްވެރިންގެ ޕާސްޕޯޓް ހިފެހެއްޓި މައްސަލާގައި މީޑިއާ އެންޑް ބްރޯޑްކާސްޓިން ކޮމިޝަނަށް އަމާޒުވަމުންދާ ފާޑުކިޔުންތަކާ ގުޅިގެން، އެ ކޮމިޝަނުން މިއަދު ބަޔާނެއް ނެރެފިއެވެ.
މީޑިއާ ކޮމިޝަނުން ނެރުނު ބަޔާނުގައި ބުނެފައިވަނީ، ފުލުހުންގެ މުއައްސަސާއިން ހިންގާ ޖިނާއީ ތަހުގީގުތަކުގައި މައުލޫމާތު ހޯދާނެ ގޮތާއި، އަމަލުކުރާނެ މިންގަނޑުތައް ކަނޑައެޅުމުގެ ގާނޫނީ ބާރެއް އެ ކޮމިޝަނަށް ލިބިފައި ނުވާ ކަމަށެވެ.
"ފުލުހުންގެ ވުޒާރާއިން އެ ފަރާތުގެ ތަހުގީގަށް ބޭނުންވާ މައުލޫމާތު ހޯދުމުގައި އަމަލުކުރަންޖެހޭ މިންގަނޑުތައް ކަނޑައެޅުމުގެ އިހުތިޔާރު މި ކޮމިޝަނަށް ލިބިފައެއް ނުވޭ،" ބަޔާނުގައިވެއެވެ.
ނަމަވެސް، މީޑިއާތަކުން ފަތުރާ ކޮންޓެންޓާ ގުޅޭ މައްސަލަތައް ބަލައި، އިދާރީ ގޮތުން އަޅަންޖެހޭ ފިޔަވަޅުތައް އެޅުމުގައި ކޮމިޝަނުން ފަސްނުޖެހޭނެ ކަމުގެ ޔަގީންކަން ވަނީ ދީފައެވެ.
މި މައްސަލަ ހޫނުވީ "އަދަދު" ނޫހުން ތައްޔާރުކުރި "އައިޝާ" ޑޮކިއުމެންޓްރީއާ ގުޅިގެން ފުލުހުން އެ ނޫހުގެ އޮފީހަށް ވަދެ، ގިނަ އަދަދެއްގެ ތަކެތި ގެންދިއުމާ ގުޅިގެންނެވެ. މި މައްސަލާގައި:
-
ފިޔާޒް މޫސާ އަދި އެޑިޓަރު ހަސަން މުހައްމަދުގެ ޕާސްޕޯޓް ވަނީ ހިފަހައްޓާފައެވެ.
-
ފުލުހުން ބުނާ ގޮތުގައި ޕާސްޕޯޓް ހިފެހެއްޓީ ތަހުގީގު ކުރިއަށްދާތީ، އެ ބޭފުޅުން ރާއްޖެއިން ބޭރަށް ފުރައިގެން ގޮސްފާނެތީއެވެ.
ރައީސްގެ ރައްދު
ރައީސް ޑރ. މުހައްމަދު މުއިއްޒަށް ބޮޑެތި ތުހުމަތުތަކެއް ކޮށްފައިވާ މި ޑޮކިއުމެންޓްރީއާ ގުޅޭގޮތުން ސުވާލުކުރުމުން، ރައީސް ވަނީ އެ ހުރިހާ ތުހުމަތުތަކެއް ކަނޑައެޅިގެން ދޮގުކުރައްވާފައެވެ. އަދި އެ ޑޮކިއުމެންޓްރީ ތައްޔާރުކުރުމުގައި ބައިވެރިވި ފަރާތްތަކާ މެދު ގާނޫނީ ފިޔަވަޅު އެޅުމަށް ކަމާބެހޭ މުއައްސަސާތަކުގައި އެދިވަޑައިގަންނަވާނެ ކަމަށްވެސް އެމަނިކުފާނު ވިދާޅުވިއެވެ.
މި މައްސަލައާ ގުޅިގެން ނޫސްވެރިންގެ ހައްގުތަކަށް ވަކާލާތުކުރާ ޖަމިއްޔާތަކުން ދަނީ ކަންބޮޑުވުން ފާޅުކުރަމުންނެވެ.
