އީރާނުން ހުށަހެޅި 10 ނުކުތާގެ އޮނިގަނޑުގައި، އެ ގައުމުގެ ނިއުކްލިއަރް އުންމީދުތައް މުޅިން ދޫކޮށްލާނެ ކަމުގެ އެއްވެސް އިޝާރާތެއް ދީފައެއް ނުވެއެވެ.
ނަމަވެސް، މިހާރު އެމެރިކާއިން އީރާނުގެ ކިބައިން މައިގަނޑު ގޮތެއްގައި އެދެމުންދަނީ ބޭސްވެރިކަމުގެ ބޭނުމަށް ކުރިއަށްގެންދާ ހަރަކާތްތައް ހިމެނޭހެން، އެއްވެސް ބާވަތެއްގެ ނިއުކްލިއަރް މަޝްރޫޢެއް ހިންގުމުގެ ހައްގު އެއްކޮށް ދޫކޮށްލުމަށެވެ.
މި މައްސަލައިގައި އީރާނުން ބުނަމުންދަނީ، ނިއުކްލިއަރް ހަތިޔާރު އުފެއްދުމަކީ މަނާކަމެއް ކަމަށް އެ ޤައުމުގެ އެންމެ މަތީ ވެރިޔާ (ސުޕްރީމް ލީޑަރު) ފަތުވާއެއް ނެރުއްވާފައިވާތާ އެތައް އަހަރެއް ވެފައިވާ ކަމަށެވެ.
ޖެނީވާ އާއި އޮމާންގައި ކުރެވުނު މަޝްވަރާތަކުގައި މިކަމަށް އެއްބަސްވުމަކާ ގާތަށް ދެވުނު ނަމަވެސް، އެ ފުރުޞަތު ގެއްލިގެންދިޔައީ އެ ޤައުމަށް ދެވުނު ޙަމަލާތަކާ ގުޅިގެންނެވެ.
ދެ ފަރާތުގެ ދެމެދުގައި އޮތް ބޮޑު އިތުބާރު ނެތުމުގެ މައްސަލަ ޙައްލުކުރުމަށް މަސައްކަތް ކުރަމުންދާ މި ދަނޑިވަޅުގައި، މިފަދަ ބަޔާންތައް ދިނުމާއި ވަކި ގޮތަކަށް ޢަމަލުކުރުމަށް މަޖުބޫރުކޮށް (އަލްޓިމޭޓަމް ދީފައި) މަޝްވަރާގެ މޭޒުން ދުރުވުމަކީ، އޮތް ދެބަސްވުންތައް ނައްތާލުމަށް އެޅޭ ހުރަހެކެވެ.
މިކަމުގައި އީރާނުން ރަސްމީ ޖަވާބެއް ދޭންޖެހޭނެ ކަމަށް ބެލެވޭއިރު، އެމެރިކާއިން ހުށަހަޅާފައިވާ އެއްބަސްވުމުގެ ތަފްޞީލުތައް އާންމުކުރަން ޖެހިދާނެއެވެ. މިހާތަނަށް އެ އެއްބަސްވުމުގައި ހިމެނޭ ކަންކަމާ މެދު ސާފު މައުލޫމާތެއް ލިބިފައެއް ނުވެއެވެ.
ވޭތުވެދިޔަ ހަ ހަފުތާގެ ތެރޭގައި އެމެރިކާ އާއި އިސްރާއީލުން ދިން ޙަމަލާތަކަށް އެ ފަރާތްތަކުން ވަނީ ކާމިޔާބުކަމާއެކު ކުރިމަތިލާފައެވެ.
އަދި ހޯރްމޫޒް ކަނޑުއޮޅި ބަންދުކޮށް، ދުނިޔޭގެ އިޤްތިޞާދަށް ބޮޑު ލޮޅުމެއް އެރުވުމުގެ ޤާބިލުކަން އެމީހުންގެ ކިބައިގައި ހުރިކަން އދ. ފަދަ އިދާރާތަކުންވެސް ވަނީ ފާހަގަކޮށްފައެވެ.
އެހެންކަމުން، މި ޙާލަތުގެ ނުރައްކާތެރިކަން އެންމެންނަށްވެސް އިހްސާސް ކުރެވެއެވެ. ނަމަވެސް އީރާނުން ތުހުމަތުކުރާ ގޮތުގައި، އެމެރިކާއިން ދަނީ ކަންކަން ނިންމުމަށް ކަނޑައަޅާފައިވާ އުޞޫލުތައް ހާލަތައް ބަލައި ބަދަލުކުރަމުންނެވެ.
