ރާއްޖޭގެ އިގްތިސާދު ސިންދަފާތު ކުރުމަށް ފެށި ބައިނަލްއަގުވާމީ ބަންކަރިން (ބޯޓުފަހަރަށް ތެޔޮ އެޅުމުގެ) ހިދުމަތުން މިހާތަނަށް ދައުލަތަށް 730 މިލިއަން ރުފިޔާގެ އާމްދަނީއެއް ލިބިފައިވާ ކަމަށް ސަރުކާރުން ހާމަކޮށްފި އެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވީ، މި ހިދުމަތް ފެށުމާ ގުޅިގެން އެކި ފާޑުކިޔުންތައް އަމާޒުވި ނަމަވެސް، ތަފާސްހިސާބުތަކުން ފެންނަނީ މި މަޝްރޫއުގެ ކާމިޔާބީ ކަމަށެވެ.
މަޝްރޫއުގެ ކުރިއެރުން:
-
ފެށި ތާރީހު: ސެޕްޓެމްބަރު 2024
-
ލިބުނު އާމްދަނީ: 730,000,000 ރުފިޔާ
-
މައިގަނޑު އުފެއްދުން: އާމްދަނީގެ ބޮޑު ބައެއް ހިއްސާކުރަނީ އަލަށް ތައާރަފްކުރި 'ލޯ ސަލްފަރ ފިއުލް އޮއިލް' އިންނެވެ.
އޮފްޝޯކޮށް އެކަމަށް ހާއްސަ ބޯޓެއް ގެނެސްގެން އެސްޓީއޯ މެދުވެރިކޮށް ދޭ މި ހިދުމަތަކީ ދުނިޔޭގެ ހަކަތައިގެ ބޮޑު ކުންފުނި 'ވިޓޯލް' އާ ގުޅިގެން ކުރިއަށްގެންދާ މަސައްކަތެކެވެ. ވަޒީރު ސައީދު ފާހަގަކުރެއްވި ގޮތުގައި، ހިދުމަތް ފެށި ފަހުން މަހުން މަހަށް ބަންކަރިންއަށް އޮތް ޑިމާންޑާއި ލިބޭ އާމްދަނީ ދަނީ މަތިވަމުންނެވެ.
ސަރުކާރުގެ އަމާޒަކީ މި ހިދުމަތް މިހާރަށްވުރެ ފުޅާކޮށް، ރާއްޖޭގެ ޖީޑީޕީއަށް އަހަރަކު 400 މިލިއަން ޑޮލަރު އިތުރުކުރުމެވެ. މިއީ ފަތުރުވެރިކަމަށް ބަރޯސާވެފައި އޮތް ރާއްޖޭގެ އިގްތިސާދަށް އިތުރު ބާރެއް ލިބިގެންދާނެ ކަމެއް ކަމަށް ސަރުކާރުން ގަބޫލުކުރެ އެވެ.
