މިދުވަސްވަރު އިހުސާސްކުރެވޭ ހޫނުމިން ވަރަށް ބޮޑަށް މަތިވެފައިވާތީ، ގިނަ ސްކޫލުތަކުން، އެކްޓިވިޓީ ޔުނީފޯމުގައި ދަރިވަރުން ސްކޫލަށް ހާޒިރުވާން އަންގައިފި އެވެ.
ސުކޫލުތަކުގެ ގަވާއިދު އޮންނަ ގޮތުން ދަރިވަރުން ވަކި ދުވަސްތަކެއްގައި ލާންޖެހެނީ ރަސްމީ ޔުނީފޯމެވެ. ރަސްމީ ޔުނީފޯމާއެކު ސްކާޓް އަދި ހަރުވާޅާއެކު ޓައީވެސް އަޅާން ޖެހޭއިރު، މި ގަދަ ހޫނުގައި، ދަރިވަރުންގެ ތަކުލީފު ކުޑަ ކުރުމުގެ ގޮތުން ހުރިހާ ދުވަހަކުވެސް އެކްޓިވިޓީ ޔުނީފޯމުލާން ވަނީ އަންގާފައެވެ.
އަދި ސުކޫލުތަކުގެ މެނޭޖުމަންޓުން ވަކި ގޮތެއް އަންގަންދެން ދަރިވަރުން އެގޮތުގެ މަތީން ޢަމަލުކުރުމަށްވެސް ވަނީ އަންގާފައެވެ.
ސުކޫލުތަކުން މިފަދަ އެންގުމަށް އަންގާފައުވާއިރު، މޫސުމާ ބެހޭ ގައުމީ އިދާރާ، މެޓު އޮފީހުން އެންމެ ފަހުން އާއްމުކޮށްފައިވާ ތަފާސްހިސާބުތަކަށް ބަލާއިރު އިހްސާސް ކުރެވޭ ހޫނުމިން އިއްޔެ އެންމެ މަތިވެފައިވަނީ ހދ. ހަނިމާދޫއަށެވެ. އެގޮތުން އެރަށުގެ، އިހުސާސްކުރެވޭ ހޫނުމިން އިއްޔެ 37.2 ޑިގްރީ ސެލްސިއަސްއަށް އެރި އެވެ. އަދި މާލޭ ސަރަހައްދުގެ ހޫނުމިން 35.1 ޑިގްރީ ސެލްސިއަސްއަށް އެރި އެވެ.
ގަދަ ހޫނުގެ ސަބަބުން ޑީހައިޑްރޭޓްވުން ނުވަތަ ހަށިގަނޑުން ފެން މަދުވުމާއި ހީޓް ސްޓްރޯކް ކަހަލަ ނުރައްކާތަކުން ސަލާމަތްވުމަށް ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސްކޮށްފަ އެވެ.
- ގިނައިން ފެން ބުއިން: ކަރު ނުހިއްކި ނަމަވެސް ގިނައިން ފެން ބުއިން
- އަވިން ސަލާމަތްވުން: ހެނދުނު 10:00 އާއި ހަވީރު 04:00 އާ ދެމެދު އަވީގައި އުޅުން މަދުކުރުމާއި ކުޑަ އެޅުމާއި ސަން ސްކްރީން ބޭނުންކުރުން
- ހެދުން އެޅުން: ލުއި ނުވަތަ ކުލަ ފަނޑު އަދި ދޫ ހެދުން އެޅުމާއި ތޮފި އެޅުން
- ހާއްސަ ސަމާލުކަން: ކުޑަކުދިންނާއި އުމުރުން ދުވަސްވީ މީހުން އަދި ބޭރުގައި މަސައްކަތްކުރާ މީހުން އިތުރަށް ސަމާލުވުން
ކޮންމެ ދުވަހެއްގެވެސް އެންމެ ހޫނު ގަދަ ގަޑިތަކެއްގެ ގޮތުގައި ފާހަގަކޮށްފައިވަނީ ހެނދުނު 10 އަކުން ފެށިގެން ހަވީރު 4 ޖެހުމާ ހަމަޔަށެވެ.
ކޮންމެ އަހަރެއްގެވެސް މި ދުވަސްވަރަކީ ރާއްޖެއަށް ހޫނު ގަދަ ދުވަސްވަރެކެވެ. ނަމަވެސް މީގެ ކުރީ އަހަރުތަކާ އަޅާބަލާއިރު މިއަހަރު ވަކިން ހޫނު ގަދަކަމަށް އާއްމުން ފާހަގަކުރެއެވެ. ހޫނު ގަދަވުމާއި، ވާރޭ ނުވެހި ގިނަދުވަސް ވުމުގެ ސަބަބުން ގިނަ ރަށްރަށުގެ ބިންގަނޑުވެސް ވަރަށް ހިރަފުސްވެފައިވާކަން ފާހަގަކޮށްލެވެއެވެ.
