މި ހަފްތާގައި މޯލްޑިވިއަން އެއަރޯއިން ވަނީ، އެ ކުންފުނީގެ ހުރިހާ ސްޓޭޝަންތަކުގައި ގަސްއިންދުމުގެ ހަރަކާތްތައް ފަށާފައެވެ.
މި ހަރަކާތްތަކަކީ، ރާއްޖެއަށް ހެޔޮ ބަދަލެއް ގެނައުމަށް ސަރުކާރުން އިސްކޮށް ހިންގާ "5 މިލިއަން ގަސް އިންދުމުގެ ޕްރޮގްރާމް" ގެ ދަށުން، މޯލްޑިވިއަން އެއަރޯއިން އިންދުމަށް ވެފައިވާ 50,000 ގަސް އިންދުމުގެ ވައުދު ފުއްދުމަށް ކުރިއަށްގެންދާ ކަމެކެވެ.
މި ޕްރޮގްރާމަކީ ރާއްޖޭގެ ތިމާވެށި ރައްކާތެރިކުރުމަށާއި، ދިގު މުއްދަތަށް ދެމެހެއްޓެނިވި ތަރައްޤީއަށް މަގުފަހިކުރުމަށް ސަރުކާރުން އިސްކޮށް ހިންގާ ބޮޑު މަޝްރޫޢެކެވެ. މޯލްޑިވިއަން އެއަރޯއިން މި ޕްރޮގްރާމުގައި ބައިވެރިވެ، 50,000 ގަސް އިންދުމުގެ ވައުދުވުމަކީ، އެ ކުންފުނިން ތިމާވެށި ރައްކާތެރިކުރުމަށް ދޭ އަހަންމިއްޔަތު އަންގައިދޭ ކަމެކެވެ.
މި ހަފްތާގައި ކުރިއަށްދާ ގަސްއިންދުމުގެ ހަރަކާތްތަކުގައި، އެ ކުންފުނީގެ މުވައްޒަފުންނާއި، އެހެނިހެން ބައިވެރިން ވެސް ހަރަކާތްތެރިވާނެއެވެ. މިއީ، ތިމާވެއްޓަށް ހެޔޮ ބަދަލެއް ގެނައުމަށް، ކޮންމެ ފަރުދެއްގެ ވެސް ބައިވެރިވުން މުހިންމުކަން ހަނދާންކޮށްދޭ ކަމެކެވެ. މިފަދަ މަސައްކަތްތަކުގެ ސަބަބުން ރާއްޖޭގެ ރީތި ތިމާވެއްޓާއި ގުދުރަތީ މުއްސަނދިކަން ކުރިއަށް އަންނަން ހުރި ޖީލުތަކަށް ދެމެހެއްޓުމަށް އެހީތެރިވެގެންދާނެއެވެ.
ރިއެކްޓް އަދި ކޮމެންޓް ކުރެއްވުމަށް
