މޫސުމީ ނޭދެވޭ ބަދަލުތަކާ ދެކޮޅަށް ކުރާމަސައްކަތުގައި ދިވެހިރާއްޖެއިން އެންމެކުރީސަފުގައި ދެމިތިބޭނެކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަތީފް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، "ބްލޫ ޕްލެނެޓް އެލަޔަންސް ފެލޯޝިޕް ޕްރޮގްރާމް" ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
އެމަނިކުފާނުގެ ވާހަކަފުޅުގައި، މޫސުމީ ނޭދެވޭ ބަދަލުތަކާ ކުރިމަތިލުމުގައި އެންމެ ކުރީސަފުގައި ތިބެގެން ހަރަކާތްތެރިވާންޖެހޭ ފަރާތްތަކުން، އީޖާދީ ޙައްލުތައް ހޯދުމަށް، މިހާރުގެ ޙާލަތަށްވުރެ ފުޅާކޮށް އަދި ޙާލަތުން ބޭރުން ވިސްނުމަށް ވަނީ ގޮވާލައްވާފައެވެ.
އަދި އެ ރަސްމިއްޔާތުގައި، ޚާއްޞަ މެހުމާނެއްގެ ގޮތުގައި ވާހަކަފުޅު ދައްކަވަމުން، ނައިބު ރައީސް ވަނީ ދިވެހިރާއްޖެ ފަދަ ކުދި ޖަޒީރާ ޤައުމުތަކުގެ ޚާއްޞަ ނާޒުކުކަން ފާހަގަކުރައްވާފައެވެ. އަދި ރާއްޖެއަށް ކުރިމަތިވެފައިވާ މޫސުމީ ނުތަނަވަސްކަމަކީ، ދިރިއުޅުމުގެ ޙަޤީޤަތަކަށް މިހާރު ވެފައިވާއިރު، ދިމާވާ ގޮންޖެހުންތަކާއެކުވެސް، މޫސުމީ ނޭދެވޭ ބަދަލުތަކާ ދެކޮޅަށް ކުރާމަސައްކަތުގައި ދިވެހިރާއްޖެއިން އެންމެކުރީސަފުގައި ދެމިތިބޭނެކަމު އަޒުމު އެމަނިކުފާނުވަނީ އާކުރައްވާފައެވެ.
ނައިބު ރައީސްގެ ވާހަކަފުޅުގައި، ދިވެހިރާއްޖޭގެ "ތަރޑް ނެޝަނަލީ ޑިޓަރމިންޑް ކޮންޓްރިބިއުޝަން" (އެން.ޑީ.ސީ) އާއެކު ފަހުން އިޢުލާނުކުރި، "2024-2033 އެނަރޖީ ރޯޑްމެޕް" ގެ މައްޗަށް އަލިއަޅުއްވައިލެއްވިއެވެ. މި ޕްލޭންގައި 2028 ވަނަ އަހަރުގެ ނިޔަލަށް އިޔާދަކުރަނިވި ހަކަތައިގެ ވަސީލަތްތަކުން ރާއްޖޭގައި ބޭނުންކުރާ ކަރަންޓުގެ 33 އިންސައްތަ އުފެއްދުމަށް އަމާޒެއް ކަނޑައަޅާފައިވާއިރު، މިއީ ދެމެހެއްޓެނިވި ގޮތެއްގައި ކުރިއަށް ދިއުމަށް އެޅުނު މުހިންމު ފިޔަވަޅެއް ކަމުގައި އެމަނިކުފާނު ވިދާޅުވިއެވެ. އަދި މި އަމާޒަކީ ތެލަށް ބަރޯސާވާ މިންވަރު ދަށްކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ ޤައުމީ އެޖެންޑާގެ މައިގަނޑު އަސާސެއްކަމުގައި ވިދާޅުވިއެވެ.
ނައިބު ރައީސް ދެއްކެވި ވާހަކަފުޅުގައި، ކުދި ޖަޒީރާ ޤައުމުތަކުން ކުރިމަތިލާންޖެހިފައިވާ ހުރަސްތަކަކީ އީޖާދީ ޚިޔާލުތަކުގެ މަގެއްކަމަށް ދެކިވަޑައިގަންނަވާ ކަމަށް ވިދާޅުވެ، ބްލޫ ޕްލެނެޓް އެލަޔަންސް ފެލޯޝިޕް ޕްރޮގްރާމްއަކީ ޖަޒީރާ ޤައުމުތަކަށް މަޢުލޫމާތު ހިއްސާކޮށް، އީޖާދީ ހައްލުތައް އުފެއްދުމަށާއި ދުނިޔޭގެ މޫސުމީ ނޭދެވޭ ބަދަލުތަކާ ގުޅޭ ޙަރަކާތްތައް ވިލަރެސްކުރުމަށް މުހިންމު މަންޞައެއްކަމަށް ވިދާޅުވިއެވެ. އަދި މި ޕްރޮގްރާމްގައި ޕޮލިސީ މާހިރުން، ޔުޓިލިޓީ ލީޑަރުން، އަދި މުޖުތަމަޢުގެ ހައްލުތަކަށް ވަކާލާތުކުރާ ފަރާތްތައް އެއްތަނަކަށް ގެނެސް، ޖަޒީރާ ޤައުމުތަކަށް، މޫސުމީ ނޭދެވޭ ބަދަލުތަކުން ކުރިމަތިވާ ކާރިސާތަކަށް ތައްޔާރުވުމާއި ސާފު ހަކަތައިގެ ޙައްލުތައް ތަންފީޒުކުރުމަށް އެކުގައި މަސައްކަތްކުރުމަށް މަގުފަހިވެގެންދާކަމުގައި ނައިބު ރައީސް ފާހަގަކުރެއްވިއެވެ.
އެމަނިކުފާނުގެ ވާހަކަފުޅު ނިންމާލެއްވީ، ޓެކްނޮލޮޖީގެ ދާއިރާއިން ބޭރަށް ނިކުމެ ވިސްނުމަށާއި، މުޖުތަމަޢުތަކަށް ބަދަލުގެނެވޭފަދަ، ދުނިޔޭގެ މޫސުމީ ނޭދެވޭ ބަދަލުތަކާ ގުޅޭ މަޝްވަރާތަކަށް ބަދަލު ގެނެވޭނެފަދަ އީޖާދީ ސިޔާސަތުތަކާއި، މާލީ އެހީ ހޯދުމުގެ ނިޒާމްތަކަށް އަމާޒު ހިފުމަށް ފެލޯޝިޕް ބައިވެރިންނަށް ހިތްވަރުދެއްވަމުންނެވެ.
ރިއެކްޓް އަދި ކޮމެންޓް ކުރެއްވުމަށް
