އިސްރާއީލު ސިފައިން ހުޅަނގު ކަރައިގެ ހެބްރޮން (އަލް-ޚަލީލް) ސިޓީ ބަންދުކޮށްގެން ހިންގަމުންދާ އަސްކަރީ ހިސާރަށް 10 ދުވަސް ވެފައިވާއިރު، އެ ސިޓީގެ އިގްތިސާދަށް ލިބެމުންދާ މާލީ ގެއްލުންތައް މިލިއަން ޑޮލަރަށް އަރައިފި ކަމަށް ކަމާބެހޭ އިދާރާތަކުން ހާމަކޮށްފިއެވެ.
ކަމާބެހޭ ކޮމިޓީތަކުން ނެރުނު ތަފާސްހިސާބުތަކަށް ބަލާއިރު، އިސްރާއީލުގެ މި ހިސާރާއި ބަންދުކުރުންތަކުގެ ސަބަބުން ދުވާލެއްގެ މައްޗަށް 12 މިލިއަން ޝެކެލް (3.8 މިލިއަން އެމެރިކާ ޑޮލަރަށްވުރެ ގިނަ) ގެ ސީދާ އިގްތިސާދީ ގެއްލުން ދަނީ ލިބެމުންނެވެ. އަދި އިންފްރާސްޓްރަކްޗަރަށް ލިބުނު ގެއްލުންތައް 6 މިލިއަން ޝެކެލްއަށް ވުރެ އިތުރުވެފައިވާއިރު، 327 އަށްވުރެ ގިނަ ވިޔަފާރިތަކާއި ފިހާރަތައް ވަނީ މުޅިން ބަންދުކުރަން ޖެހިފައެވެ.
މި ހިސާރުގެ ތެރޭގައި އިސްރާއީލު ސިފައިން ވަނީ 15 އަށްވުރެ ގިނަ އިމާރާތްތަކާއި ގެތައް ސުންނާފަތިކޮށް، ގިނަ އަދަދެއްގެ އާންމުންގެ ގެތައް އަސްކަރީ މަރުކަޒުތަކަށް ބަދަލުކޮށްފައެވެ. މީގެ ސަބަބުން 537 އާއިލާއެއްގެ 3,300 އަށްވުރެ ގިނަ މީހުން ގެދޮރުދޫކޮށް ދާންޖެހިފައިވާއިރު، ޖުމްލަ 5,000 އަށްވުރެ ގިނަ އާންމުންނަށް މި ހަމަލާތަކުގެ އަސަރު ވަނީ ކޮށްފައެވެ.
މި ސިލްސިލާ ފިޔަވަޅުތަކުގެ ސަބަބުން ހެބްރޮންގެ ސަރަހައްދީ ވިޔަފާރިއާއި އާންމު ދިރިއުޅުމުގެ ނިޒާމު މުޅިން ހުއްޓުމަކަށް އައިސް، އާންމު ރައްޔިތުންގެ ކެއިންބުއިމާއި ސިއްހީ ޚިދުމަތްތަކަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
