އިޖުތިމާޢީ ބަދަހި މަދަދުވެރިން (އިބަމަ) ގެ މަސައްކަތްތަކާއި ގުޅޭގޮތުން އިބަމައިގެ މަސައްކަތުގައި އެހީތެރިކަން ފޯރުކޮށްދެވޭނެ މުއައްސަސާތަކުގެ އިސް މުވައްޒަފުންނަށް މަޢުލޫމާތު ފޯރުކޮށްދިނުމަށްޓަކައި ސޯޝަލް މިނިސްޓްރީގެ ފަރާތުން ފަށައިގެން ކުރިއަށްގެންދާ ސިލްސިލާ ޕްރޮގްރާމްގެ ދަށުން އާސަންދަ ކުންފުނީގެ ސީނިއަރ މެނޭޖްމަންޓްގައި ހިމެނިވަޑައިގަންނަވާ މުވައްޒަފުންނަށް އިބަމައާ ގުޅޭ މަޢުލޫމާތު ހިއްސާކޮށްފިއެވެ.
އިބަމައާ ގުޅޭ މަޢުލޫމާތު ހިއްސާކުރުމަށް ސޯޝަލް މިނިސްޓްރީގެ ފަރާތުން އާސަންދަ ކުންފުނީގެ އޮފީހުގައި ކުރިއަށްގެންދިޔަ މި ސެޝަންގައި އިބަމަ އަކީ ކޮބައިކަމާއި، އިބަމައިން ކުރަމުން ގެންދާ މަސައްކަތްތަކާއި، ރާއްޖޭގެ ރަށްރަށުގައި އިބަމަ ގާއިމްކުރުމަށްޓަކައި ޔުނިސެފްއާއި ހިއްސާދާރު އެހެން މުއައްސަސާތައް ގުޅިގެން މި ވުޒާރާއިން މިހާތަނަށްކޮށްފައިވާ މަސައްކަތްތަކާއި، ކުރިއަށް ރާވާފައި ހުރި ކަންކަމާއި އިބަމައިގެ ސަބަބުން މިހާތަނަށް ހާސިލްކުރެވިފައިވާ ކާމިޔާބު ބައެއް ނަތީޖާތަކާ ގުޅޭގޮތުން މަޢުލޫމާތު ހިއްސާކޮށްފައިވެއެވެ.
އިބަމައަކީ ރަށްރަށުގައި އިޖުތިމާޢީ ރައްކާތެރިކަން ފޯރުކޮށްދިނުމުގެ މަސައްކަތް ކަމާގުޅުންހުރި މުއައްސަސާތަކާއެކު ވިލަރެސް ކުރެވިފައިވާ ނިޒާމެއްގެ ތެރެއިން ކުރުމަށްޓަކައި އުފައްދާ ގްރޫޕްތަކެކެވެ.
ރިއެކްޓް އަދި ކޮމެންޓް ކުރެއްވުމަށް
