ހެލްމެޓް އެޅުން ލާޒިމު ނޫން ސަރަހައްދުތަކުގައި ހެލްމެޓް އަޅައިގެން އުޅޭ މީހުން ހުއްޓުވައި ބަލައި ފާސްކުރުމަށް މޯލްޑިވްސް ޕޮލިސް ސަރވިސްއިން ނިންމައިފިއެވެ. މިއީ ފަހަކަށް އައިސް ކުށްކުރުމުގެ ނިޔަތުގައި ހެލްމެޓް އަޅައިގެން އުޅޭ މީހުން އިތުރުވަމުން އައުމާ ގުޅިގެން އަޅާ ފިޔަވަޅެކެވެ.
ފުލުހުންގެ ބަޔާނެއްގައި ބުނީ ހެލްމެޓް އެޅުން ލާޒިމުކޮށްފައި ވަނީ ގަޑިއަކު 30 ކިލޯމީޓަރަށްވުރެ ބާރަށް އުޅަނދު ދުއްވަން ހުއްދަކޮށްފައިވާ ސަރަހައްދުތަކުގައި އެކަނިކަމަށާއި، ނަމަވެސް ފަހަކަށް އައިސް ހެލްމެޓް އަޅައިގެން ވިޔަފާރިތަކަށާއި ޚިދުމަތްދޭ ތަންތަނަށް ވަދެ އެކި ކުށްކުރާ މީހުން އިތުރުވެފައިވާކަން ފާހަގަކުރެވިފައިވާ ކަމަށެވެ.
ފުލުހުންގެ ތަޙްޤީޤުތަކުން ދައްކާ ގޮތުގައި މިފަދަ ޢަމަލުތައް ހިންގާ ފަރާތްތަކުން ހެލްމެޓް ބޭނުންކުރަނީ އެމީހުންގެ އައިޑެންޓިޓީ ފޮރުވުމަށެވެ. މިކަމާ ގުޅިގެން ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި މި ފިޔަވަޅު އަޅަން ޖެހުނުކަމަށް ފުލުހުން ވިދާޅުވެފައިވެއެވެ.
މި އައު އުސޫލުގެ ދަށުން، ހެލްމެޓް އެޅުން ލާޒިމު ނޫން ސަރަހައްދުތަކުގައި ހެލްމެޓް އަޅައިގެން އުޅޭ މީހުން ހުއްޓުވައި، އެމީހުންގެ އައިޑެންޓިޓީ ޗެކްކޮށް، ބަލައި ފާސްކުރެވޭނެއެވެ. އަދި ޤާނޫނާ ޚިލާފު އެއްވެސް ކަމެއް ފާހަގަކުރެވިއްޖެނަމަ، އެކަމާމެދު ޤާނޫނީ ފިޔަވަޅު އެޅޭނެކަމަށްވެސް ފުލުހުން ވަނީ ބުނެފައެވެ.
ފުލުހުން ބުނީ މި ފިޔަވަޅަކީ އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި އަޅާ ފިޔަވަޅެއްކަމަށާއި، މިކަމުގައި އާންމު ރައްޔިތުންގެ އެއްބާރުލުން ބޭނުންވާކަމަށެވެ.
ރިއެކްޓް އަދި ކޮމެންޓް ކުރެއްވުމަށް
