ބަންގްލަދޭޝްގައި ވޭތުވެދިޔަ 35 އަހަރުގެ ތެރޭގައި ބޭއްވި ފުރަތަމަ ވާދަވެރި ރިޔާސީ އިންތިޚާބު ކާމިޔާބު ކުރައްވައި، އެ ގައުމުގެ އާ ރައީސްގެ މަގާމަށް ވެރިކަންކުރާ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) ގެ އިސް ސިޔާސީ ޝަޚުޞިއްޔަތެއް ކަމަށްވާ މިރްޒާ ފަޚްރުލް އިސްލާމް އަލަމްގީރު އިންތިޚާބުވެވަޑައިގެންފިއެވެ.
މި އިންތިޚާބަކީ 1991 ވަނަ އަހަރުގެ ފަހުން އެ ގައުމުގައި އެކަކަށްވުރެ ގިނަ ކެންޑިޑޭޓުން ވާދަކުރައްވައިގެން ބޭއްވި ފުރަތަމަ ރިޔާސީ އިންތިޚާބެވެ. އެ ގައުމުގެ ގާނޫނުހަދާ މަޖިލީހުގައި މިއަދު ކުރިއަށްދިޔަ ވޯޓުލުމުގައި ބީއެންޕީގެ ކެންޑިޑޭޓް އަލަމްގީރު ވަނީ 255 ވޯޓު ހޯއްދަވާފައެވެ. އޭނާއާ ވާދަކުރެއްވި އިދިކޮޅު ޖަމާއަތޭ އިސްލާމީ ކޯލިޝަނުގެ ކެންޑިޑޭޓް ކޮލޮނަލް ރިޓަޔާޑް އޮލީ އަހުމަދަށް ލިބިވަޑައިގަތީ 88 ވޯޓެވެ.
މި އިންތިޚާބުގައި ވޯޓުލުމުގެ ހައްގު ލިބިފައިވާ 349 މެންބަރުންގެ ތެރެއިން 343 މެންބަރުން ވޯޓުލުމުގައި ބައިވެރިވެފައިވެއެވެ. މި އިންތިޚާބު ބާއްވަން ޖެހުނީ ކުރީގެ ބޮޑުވަޒީރު ޝެއިޚް ހަސީނާގެ ސަރުކާރުގައި، 2023 ވަނަ އަހަރު އެއްވެސް ވާދަވެރިޔަކާ ނުލައި ރައީސްކަމަށް އިންތިޚާބުވެވަޑައިގެންނެވި މުހައްމަދު ޝަހާބުއްދީން، ސިއްހީ ސަބަބުތަކަށްޓަކައި މިދިޔަ މަހު މަގާމުން އިސްތިއުފާ ދެއްވުމާ ގުޅިގެންނެވެ. ބަންގްލަދޭޝްގެ ގާނޫނުއަސާސީ ބުނާގޮތުން ރައީސްގެ މަގާމު ހުސްވާތާ 90 ދުވަހުގެ ތެރޭގައި އާ ރައީސަކު އިންތިޚާބު ކުރަންޖެހެއެވެ.
ބަންގްލަދޭޝްގެ ރިޔާސީ އިންތިޚާބުތަކުގައި 1991 ވަނަ އަހަރުގެ ފަހުން މިހާތަނަށް ރައީސުން އިންތިޚާބު ކުރަމުން އައީ ވާދަވެރި ކެންޑިޑޭޓަކާ ނުލައި، ސިޔާސީ ޕާޓީތަކުގެ މެދުގައި އެއްބަސްވުމަކަށް އައިސްގެންނެވެ. ނަމަވެސް، މި ފަހަރުގެ އިންތިޚާބުގައި އިދިކޮޅު އިއްތިހާދުން ކެންޑިޑޭޓަކު ނެރުމަށް ނިންމުމާ ގުޅިގެން، މިއީ ގިނަ އަހަރުތަކަކަށްފަހު ބޭއްވުނު ފުރަތަމަ ވާދަވެރި އިންތިޚާބަށް ވެގެންދިޔައެވެ. އާ ރައީސް މިރްޒާ ފަޚްރުލް އިސްލާމް އަލަމްގީރު މަގާމުގެ ހުވާ ކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މާދަމާގެ ވަގުތެއްގައެވެ. ބަންގްލަދޭޝްގެ ރައީސްގެ މަގާމަކީ މައިގަނޑު ގޮތެއްގައި ރަމްޒީ މަގާމެއް ނަމަވެސް، ގައުމުގައި ސިޔާސީ ބޮޑެތި ކްރައިސިސްތައް ކުރިމަތިވާ ވަގުތުތަކުގައި ރައީސްގެ ދައުރު ވަރަށް މުހިންމުވެއެވެ.
