ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ކްރިސްޓިއާނޯ ރޮނާލްޑޯ، މިހާރު ކުރިއަށްދާ ސީޒަނަށްފަހު ކުޅުން ހުއްޓާލަން ނިންމާފައިވާ ކަމުގެ އެންމެ ވަރުގަދަ އިޝާރާތް ދީފިއެވެ.
ޕޯޗުގަލްގެ ގައުމީ ޓީމުގެ ކެޕްޓަން މިކަން ހާމަކޮށްފައިވަނީ މަޝްހޫރު ލައިފްސްޓައިލް މެގަޒިންއެއް ކަމަށްވާ "ވޯގް" އަށް ދިން ބަސްދީގަތުމެއްގައެވެ. އުމުރުން 41 އަހަރުގެ ރޮނާލްޑޯ ބުނި ގޮތުގައި މިއީ އޭނާގެ ފުޓްބޯޅަ ކެރިއަރުގެ ފަހު އަހަރަށް ވުން ވަރަށް ގާތެވެ.
އަދި އޭނާ ބޭނުންވަނީ ކުޅިވަރުގެ މައިދާނުން ވަކިވެގެންދާއިރު، ފާހަގަކޮށްލެވޭ ފަދަ މޮޅު އަދި ފުރިހަމަ ތާރީޚެއް ދޫކޮށްލުމަށް ކަމަށް ވެސް އޭނާ ފާހަގަކުރިއެވެ. ސައުދީ ޕްރޮފެޝަނަލް ލީގުގެ އަލް ނަސްރު ކްލަބަށް މިހާރު ކުޅެމުންދާ ރޮނާލްޑޯގެ ކޮންޓްރެކްޓް ހަމަވާން އޮތީ އަންނަ އަހަރުގެ މެދުތެރެއަށެވެ.
އޭނާގެ ދިގު ފުޓްބޯޅަ ކެރިއަރުގައި މެންޗެސްޓާ ޔުނައިޓެޑާއި، ރެއާލް މެޑްރިޑްގެ އިތުރުން ޔުވެންޓަސް ފަދަ ދުނިޔޭގެ ނުފޫޒުގަދަ ކްލަބުތަކަށް ކުޅެ ގިނަ ކާމިޔާބީތަކެއް ވަނީ ހޯދާފައެވެ. ފުޓްބޯޅަ ކުޅުން ހުއްޓާލުމަށްފަހު ދެން ކުރާނެ ކަންތައްތައް މިހާރު ވެސް ރާވާފައިވާ ކަމަށް ރޮނާލްޑޯ ބުންޏެވެ. އެގޮތުން އާއިލާއާއެކު ގިނަ ވަގުތު ހޭދަކުރުމާއި، ދަތުރުފަތުރު ކުރުމުގެ އިތުރުން އޭނާ ކުޅެން ބޭނުންވާ އެހެނިހެން ކުޅިވަރުތަކަށް ވަގުތު ހުސްކުރާނެ ކަމަށް އޭނާ ހާމަކުރިއެވެ.
