ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ހއ. ފިއްލަދޫ، ހއ. މުރައިދޫ، އަދި ހއ. ކެލާގައި ހިންގުމަށް ހަމަޖެހިފައިވާ ތަރައްގީގެ މަޝްރޫއުތަކަށް ބޭނުންވާ ބަރު އުޅަނދުފަހަރާއި ވެހިކަލްތައް އެ ރަށްރަށަށް ފޮނުވުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބާރުމިނުގައި ފަށައިފިއެވެ.
އާރްޑީސީން މައުލޫމާތު ދޭ ގޮތުގައި، މި ތިން ރަށުގައި ކުރިއަށްގެންދާ މަޝްރޫއުތަކުގެ ތެރޭގައި މައިގަނޑު ގޮތެއްގައި ހިމެނެނީ މަގުހެދުމާއި، ބަނދަރުގެ ސަރަހައްދު ތަރައްގީކުރުމުގެ އިތުރުން ފެންހިއްކާ ނިޒާމު ގާއިމުކުރުމުގެ މުހިންމު މަސައްކަތްތަކެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން، ހއ. ފިއްލަދޫ، ހއ. މުރައިދޫ، އަދި ހއ. ކެލާގައި ހިންގުމަށް ހަމަޖެހިފައިވާ މަޝްރޫއުތަކަށް ބޭނުންވާ ވެހިކަލްތަށް ފޮނުވުމުގެ މަސައްކަތް ދަނީ ކުރަމުންނެވެ.#TeamRDC pic.twitter.com/xLOlcrmACa
— Road Development Corporation Ltd (@rdcmaldives) August 13, 2026
މި މަޝްރޫއުތަކަށް ބޭނުންވާ އެކްސްކަވޭޓަރާއި، ލޯޑަރ އަދި ޑަމްޕް ޓްރަކް ފަދަ ތަފާތު ބަރު އުޅަނދުތައް އެ ރަށްރަށަށް ފޮނުވުމުން، އަމަލީ މަސައްކަތްތައް އަވަސްކޮށް، ތާވަލާ އެއްގޮތަށް ނިންމުމަށް ބޮޑު އެހީތެރިކަމެއް ލިބިގެންދާނެއެވެ.
މި ތިން ރަށުގެ ތެރެއިން ހއ. ކެލާ އަދި ފިއްލަދޫގައި ކުރިއަށްދާ މަގުހެދުމުގެ މަޝްރޫއުގެ ދަށުން، ތާރުއެޅުމާއި، މަގުތަކުގައި ފެންބޮޑުވުން ހައްލުކުރުމަށް ފެންހިންދާ ނިޒާމު ގާއިމުކުރުމުގެ އިތުރުން މަގުބައްތި ޖެހުމުގެ މަސައްކަތް ކުރިއަށްދާނެއެވެ.
އާރްޑީސީން ބުނީ، އަމާޒަކީ ރަށްރަށުގެ ތަރައްގީގެ މަޝްރޫއުތައް ހުއްޓުމެއްނެތް ގޮތެއްގައި ކުރިއަށްދާނެކަން ކަށަވަރުކޮށް، ރައްޔިތުންނަށް ދިމާވެފައިވާ ދަތިތަކަށް އަވަސް ހައްލެއް ހޯދައިދިނުން ކަމަށެވެ.
