ޕްރިންސް ހެރީ އިނގިރޭސިވިލާތަށް ކުރައްވަން ހަމަޖެހިފައިވާ ދަތުރުފުޅުގެ ޕްލޭންތަކަށް ބަދަލުތަކެއް ގެންނަވައިފިއެވެ.
ޑިއުކް އޮފް ސަސެކްސް އިނގިރޭސިވިލާތުގެ ލަންޑަނަށް ކުރައްވާ ޒިޔާރަތުގައި، އަނބިކަނބަލުން މޭގަން މާކަލް އާއި އެބޭފުޅުންގެ ދަރިކަލުންނާއި ދަރިކަނބަލުން ބައިވެރިނުވާނެކަން ހެރީގެ ތަރުޖަމާނު ވަނީ އިއްޔެ (ޖުލައި 4 ގައި) ކަށަވަރުކޮށްދީފައެވެ.
މި ބަދަލު ގެނެސްފައިވަނީ ޝާހީ ދިރިއުޅުން ދޫކޮށްލެއްވުމާ ގުޅިގެން، އެ ޢާއިލާއަށް އިނގިރޭސިވިލާތުން ލިބޭނެ ސަލާމަތީ ކަންކަމާ މެދު ގިނަ ބަހުސްތަކެއް ކުރެވެމުންދާ ދަނޑިވަޅެއްގައެވެ. ނަމަވެސް، މީގެ މާނައަކީ އުމުރުން 44 އަހަރުގެ މޭގަން އާއި، 7 އަހަރުގެ ޕްރިންސް އާޗީ އަދި 5 އަހަރުގެ ޕްރިންސެސް ލިލިބެޓް މި ދަތުރުގައި އެއްގޮތަކަށްވެސް ބައިވެރިނުވުމެއް ނޫނެވެ. ތަރުޖަމާނު ހާމަކުރި ގޮތުގައި ލަންޑަނުގެ ރަސްމީ ކަންކަން ނިންމުމަށްފަހު ހެރީ (41 އަހަރު) އިނގިރޭސިވިލާތުގެ އުތުރުގެ ސަރަހައްދުތަކަށް ކުރައްވާ ދަތުރުތަކުގައި މޭގަން އާއި ކުދިން ބައިވެރިވުމާ މެދު އަދިވެސް ދަނީ ވިސްނަމުންނެވެ.
މި ނިންމުން ނިންމާފައިވަނީ ފަސް ދުވަހުގެ މި ދަތުރުފުޅުގައި ސަސެކްސްގެ ޢާއިލާއަށް ދައުލަތުގެ ޚަރަދުގައި ފުލުހުންގެ ސަލާމަތީ ކަންކަން ހަމަޖައްސައިނުދޭނެކަން ކަށަވަރުވުމާ ގުޅިގެންނެވެ.
ހެރީ އާއި މޭގަން އެންމެ ފަހުން އެކުގައި އިނގިރޭސިވިލާތަށް ގޮސްފައިވަނީ 2022 ވަނަ އަހަރުގެ ސެޕްޓެމްބަރު މަހު، ރާނީ އެލިޒަބެތު II ގެ ޖަނާޒާއަށެވެ. 2020 ވަނަ އަހަރު ޝާހީ ޒިންމާތަކުން ދުރުވުމާ ގުޅިގެން ސަލާމަތީ ރައްކާތެރިކަން ކަނޑާލުމުން، އާއިލާގެ ސަލާމަތަށްޓަކައި އަނބިދަރިން އިނގިރޭސިވިލާތަށް ގެންދަން ޖެހިލުންވާކަމަށް ހެރީ މީގެ ކުރިންވެސް ވިދާޅުވެފައިވެއެވެ.
މިދިޔަ މަހު ހެރީ އާއި މޭގަން ވަނީ ރަސްގެފާނު ޗާލްސް ހުށަހެޅުއްވި ޝާހީ ގަނޑުވަރެއްގައި ހުންނެވުމުގެ ފުރުސަތު ގަބޫލުކުރައްވާފައެވެ. އެތަނުގައި ސަލާމަތީ ކަންކަން ވަރުގަދަވާނެ ކަމަށް ބެލެވުނު ނަމަވެސް، ހެރީގެ ތަރުޖަމާނު ވިދާޅުވީ މައްސަލައަކީ ހުންނާނެ ތަނެއް ނޫން ކަމަށާއި، މުޅި ދަތުރުގެ ހުރިހާ ވަގުތެއްގައި އެކަށީގެންވާ ރައްކާތެރިކަން ލިބުމެވެ.
ހެރީ ވަނީ މީގެ ކުރިންވެސް ބީބީސީއަށް ދެއްވި އިންޓަވިއުއެއްގައި، މިހާރު އޮތް ޙާލަތަށް ބަލައި އަނބިދަރިން އިނގިރޭސިވިލާތަށް ގެންދެވޭނެ ފަދަ މާޙައުލެއް ނެތް ކަމަށް ވިދާޅުވެ ކަންބޮޑުވުން ފާޅުކުރައްވާފައެވެ
