ބޮޑުތަކުރުފާނު މަގާއި ޗާންދަނީމަގު ގުޅޭ ސަރަހައްދުގެ ޓްރެފިކަށް ވަގުތީ ބަދަލުތަކެއް ގެނެސް، އެ ސަރަހައްދުގައި ދެކޮޅަށް ދުއްވޭގޮތަށް މާލެ ސިޓީ ކައުންސިލުން ހަމަޖައްސައިފިއެވެ.
މާލެ ސިޓީ ކައުންސިލުން މައުލޫމާތު ދީފައިވާ ގޮތުގައި، މި ބަދަލަކީ ބޮޑުތަކުރުފާނު މަގު (ބޭރުމަގު) ޒަމާނީ ފެންވަރަށް ތަރައްގީކުރުމަށް ކުރިއަށްގެންދާ މަޝްރޫއާ ގުޅިގެން، އެ ސަރަހައްދުގެ ޓްރެފިކް ފްލޯ އަށް ދިމާވެދާނެ ދަތިތަކަށް ހައްލެއް ހޯދައިދިނުމުގެ ގޮތުން ގެނައި ބަދަލެކެވެ. މިގޮތުން ޗާންދަނީމަގާއި ބޮޑުތަކުރުފާނު މަގު ގުޅޭ ސަރަހައްދުން ދަތުރުކުރާ އުޅަނދުތަކަށް ދެކޮޅަށް ދުއްވޭނެ އިންތިޒާމު މިހާރު ވަނީ ވަގުތީ ގޮތުން ހަމަޖައްސާފައެވެ.
ބޮޑުތަކުރުފާނު މަގު ފުޅާކޮށް އިތުރަށް ތަރައްގީ ކުރުމުގެ މަސައްކަތް ހަލުވިކަމާއެކު ކުރިއަށްދާއިރު، މިހާރު އަމަލީ މަސައްކަތް ކުރިއަށްދަނީ ރަސްމީ ފާލަމުން ފެށިގެން ނަސަންދުރަ ހުންނަ ސަރަހައްދާ ހަމައަށެވެ. މި މަސައްކަތް ކުރިއަށްދާ ވަގުތުތަކުގައި މަގު ބޭނުންކުރާ ފަރާތްތަކަށް ވީހާވެސް ލުއިފަސޭހަ އިންތިޒާމެއް ހަމަޖައްސައިދިނުމަކީ ސިޓީ ކައުންސިލްގެ އަމާޒެކެވެ.
އެހެންކަމުން، މި ސަރަހައްދުން ދަތުރުކުރާ އުޅަނދުފަހަރު ދުއްވާ ފަރާތްތަކުން ޓްރެފިކް ނިޝާންތަކަށް ސަމާލުކަން ދިނުމަށާއި، މަގުގެ ސަލާމަތާއި ރައްކާތެރިކަމަށް އިސްކަންދިނުމަށް ކަމާބެހޭ އިދާރާތަކުން އިލްތިމާސްކުރެއެވެ. ބޭރުމަގު ތަރައްގީކުރުމުގެ މަޝްރޫއު ނިމުމުން މާލޭގެ ޓްރެފިކް މައްސަލަތަކަށް ބޮޑު ލުޔެއް ލިބިގެންދާނެ ކަމަށް ބެލެވެއެވެ.
